رەسەيدە تۇراتىن قازاقتىڭ استانادا سۋرەت كورمەسى اشىلدى
كورمەدە سۋرەتشىنىڭ 30-دان استام جۇمىستارى ۇسىنىلدى، دەپ حابارلايدى قازاقپارات ءتىلشىسى.
ءادىل اۋباكىروۆ رەسەيدىڭ قازاعى، استراحاننان كەلگەن جاس سۋرەتشى، ماسكەۋدە، سانكت- پەتەربۋرگتە، سەن- تروپەدە جانە ت. ب. وتكەن جەكە جانە توپتىق كورمەلەردىڭ مۇشەسى. بۇل كورمە ونىڭ استاناداعى، ياعني ءوزىنىڭ تاريحي وتانىنداعى العاشقى جۇمىس تاجىريبەسى بولىپ وتىر. قازاقستانعا العاش رەت وتكىزىلەتىن «Astana Art Show» حالىقارالىق كورمەسىنە قاتىسۋعا كەلگەن ول جەكە كورمەنى وتكىزۋ ارقىلى حالقىنىڭ مادەنيەتى مەن تاريحى تۋرالى كوبىرەك بىلۋگە ۇمتىلادى.
«مەنىڭ ونەرىمە دەگەن باعىت ءوز تاريحىمنان، ەجەلدەن باستاۋ الاتىنداي. كەرەك دەسەڭىز، شامانيزم مانىنەن سىر تارتىپ، ءوزىمدى تابيعاتپەن بىرىكتىرەتىن تىڭ دۇنيەنى ومىرگە اكەلگىم كەلەدى. شابىت كەلىپ، كەزەكتى تۋىندىڭا كىرىسكەندە بويداعى ونەر بيلەگەن وسىناۋ تالاپ- تىلەككە ەشقانداي قارسىلىق كورسەتە المايسىڭ. سۋرەتتەرىمنىڭ نەگىزىن كلاسسيكالىق تەحنيكامەن سالامىن. الايدا سۋرەت ونەرىنە مەن زامانعا ساي كوزقاراسپەن، تىڭعا تۇرەن سالىپ قاراعىم كەلەدى. ءداستۇرلى ويۋ- ورنەكتەردى قولدانۋدان بۇرىن زامانداستارىما تىڭ تۋىندى ۇسىنعىم كەلەدى»، - دەيدى سۋرەتشى.
ءادىل اۋباكىروۆ ءوز سوزىندە اتاپ وتكەندەي، ءتۇرلى-ءتۇستى بوياۋ ارقىلى سۋرەتشى ءوزىنىڭ ىشكى دۇنيەسىن سىرتقا شىعارا الادى.
«سۋرەت سالعان كەزدە مەن وتكەنمەن ديالوگ قۇرامىن. دەمەك، ەسكى مادەنيەتتەردىڭ وشاقتارىن ىزدەيتىن سەكىلدىمىن. قازاقستانعا العاش جازدا كەلگەن ەدىم. ەكىنشى رەت جولىم مىنە بۇگىن ءتۇسىپ وتىر. مۇندا كۇن سۋىق بولعانىمەن، ادامداردىڭ كوڭىلى جىلىلىق سىيلايدى»، - دەيدى ول.
سۋرەتشى ءوز سوزىندە تۋىندىلارى فرانتسيا مەن يسپانيا ەلدەرىندە جارمەڭكەلىك كورمەلەرگە قاتىسقانىن ايتادى.
«تۋىندىلاردى دۇنيەگە اكەلۋدى ماقسات تۇتامىن. ءبىراق، جۇمىسىم كەشەندى بولعانىن قالار ەدىم. ەڭ باستىسى سۋرەت ويلى تۇردە سالىنۋى كەرەك. ويلى سۋرەت ءوز ورنىن تابادى. شابىتىمدى شارىقتاتۋ ءۇشىن موتوتسيكلمەن دالانى كەزەتىن ادەتىم بار. كەڭ كوسىلگەن كەرميىق دالادا جەلمەن جارىسىپ كەلە جاتقاندا سۋرەت دەگەن وي بولىپ ساناڭدى ۇيىرەدى. بالا كەزدەن اتام دالا قاسيەتىن، مادەنيەتىن سەزدىرۋگە تىرىستى. وسكەن شاقتا عانا وسىناۋ دالا قاسيەتى ماعان قانشالىقتى اسەر ەتكەنىن اڭعارعانداي بولدىم. جوسپارىم - جالعاستىرۋ، ۇلى دالانى ماداقتاۋدى جالعاستىرۋ»، - دەيدى سۋرەتشى.
ەلوردا تۇرعىندارىنا ءادىل «تاعدىر جازۋى» تاقىرىبى بويىنشا سۋرەتتەرىن ۇسىنىپ وتىر. سۋرەتشىنىڭ ايتۋىنشا، سىرتقى الەم - بۇل بولمىستىڭ تولىقتىعى ەمەس، زەرتتەلمەگەن ۇلكەن ءبۇتىن ديناميكالىق سۇلبا.
سۋرەتشىنىڭ نازارىندا ادام، ءتۇس، سىزىق، سيۋررەاليزم، ەكسپرەسسيا، ابستراكسيا بار. وسىنىڭ ءبارى ءوزىنىڭ جارقىن جانە ەموتسيالىق سۋرەتتەرىندە سيقىرلى تۇردە بىرىكتىرىلەدى. ول ءوز جۇمىستارىن ءبىر ستيلدە شەكتەۋدى ءجون كورمەيدى ەكەن.
«21- عاسىردىڭ سۋرەتشىسى ءادىل اۋبەكىروۆ تاعدىر بەلگىلەرىن جورامالدى عىلىمداردان ەمەس، ءوز ونەرىنەن ىزدەيدى. سۇلۋلىق ونىڭ جۇرەگىندە، سول سۇلۋلىقتى الەمگە تاراتۋ ءساتىن كۇتىپ ءجۇر سۋرەتشى»، - دەيدى كورمە كۋراتورى ەرجان اقاتايەۆ.
استانا تۇرعىندارى مەن قوناقتارى اتالمىش كورمەنى 2019 -جىلدىڭ 12 -قاڭتارىنا دەيىن تاماشالاي الادى. كورمەگە كىرۋ تەگىن.
فوتوسۋرەت: astana.gov.kz