مەملەكەتتىك حاتشى جاستار اراسىنداعى قىلمىستىڭ الدىن الۋ شارالارىن قابىلداۋدى تاپسىردى

 استانا. قازاقپارات - ق ر مەملەكەتتىك حاتشىسى گۇلشارا ءابدىقالىقوۆا مەملەكەتتىك جانە جەرگىلىكتى اتقارۋشى ورگاندارعا جاستار اراسىنداعى قىلمىستىڭ ورشۋىنە قارسى شارالار كەشەنىن قابىلداۋدى تاپسىردى، دەپ حابارلايدى قازاقپارات ءتىلشىسى.

 «جاستار اراسىنداعى قىلمىستىڭ ورشۋىنە قارسى پروفيلاكتيكالىق شارالار كەشەنىن قابىلداۋدى تاپسىرامىن. ديەۆيانتتى مىنەز- قۇلىققا بەيىم قۇقىقبۇزۋشىلاردى قوعامدىق قىزمەتكە تارتۋ بويىنشا جۇمىستاردى ۇيىمداستىرۋ قاجەت. اسىرەسە، ماسكۇنەمدىك پەن ناشاقورلىققا سالىنعان وتباسىلاردىڭ بالالارىنا ەرەكشە نازار اۋدارۋ كەرەك» ، - دەدى گ. ءابىقالىقوۆا.

مەملەكەتتىك حاتشى كۇردەلى ومىرلىك جاعدايلارعا تاپ بولعان، سونىڭ ىشىندە باس بوستاندىعىنان ايىرۋ ورىندارىنان بوساپ شىققان جاستار ءۇشىن الەۋمەتتىك جوبالاردى جۇزەگە اسىرۋ مۇمكىندىگىن قاراستىرۋدى تاپسىردى.

«پسيحولوگيالىق كۇيزەلىس جاعدايىنداعى جانە تاۋەكەل توپتارىنداعى جاستاردى ەرتەرەك انىقتاۋ بويىنشا شارالار كەشەنىن قابىلداۋ قاجەت. «رۋحاني جاڭعىرۋ» باعدارلاماسى مەن «اۋىل - ەل بەسىگى» ارنايى جوباسىن جۇزەگە اسىرۋعا جاستاردى تارتۋ بويىنشا اقپاراتتىق جۇمىستار جۇرگىزىلسىن» ، - دەپ اتاپ ءوتتى گ. ءابدىقالىقوۆا.

بۇل تاپسىرمالار ىشكى ىستەر، دەنساۋلىق ساقتاۋ، ءبىلىم جانە عىلىم، قوعامدىق دامۋ، اقپارات جانە كوممۋنيكاتسيالار مينيسترلىكتەرىنە جانە باسقا دا مۇددەلى مەملەكەتتىك ورگاندارعا، استانا، الماتى، شىمكەنت قالالارى مەن وبلىستارىنىڭ اكىمدىكتەرىنە جۇكتەلدى.

 ەسكە سالايىق، بۇگىن استانادا مەملەكەتتىك حاتشى گۇلشارا ءابدىقالىقوۆانىڭ جەتەكشىلىگىمەن ق ر پرەزيدەنتى جانىنداعى جاستار ساياساتى جونىندەگى كەڭەستىڭ كەزەكتى وتىرىسى ءوتتى.