تاريحىمىزعا قاتىستى تىڭ مالىمەتتەر شەتەلدىك ارحيۆتەردە جاتىر
بۇل تۋرالى ەلباسىنىڭ «ۇلى دالانىڭ جەتى قىرى» اتتى ماقالاسىنا وراي پىكىر بىلدىرگەن مەملەكەتتىك تاريح ينستيتۋتىنىڭ باس عىلىمي قىزمەتكەرى عاني قاراسايەۆ ايتتى، دەپ حابارلايدى قازاقپارات ءتىلشىسى.
«قازاقستانداعى بارلىق ءارحيۆتى قاراپ شىقتىق، وندا ايتارلىقتاي دەرەك جوق. ۇلكەن مالىمەتتەر رەسەيدىڭ سانكت- پەتەربور، ماسكەۋ، ومبى جانە شەتەل ارحيۆتەرىندە جاتىر. ءبىراق، ولار جابىق، بارساڭىز بەرمەيدى. ولاردا قازاقتىڭ وتارشىلىق زاردابىن تارتقانى جونىندە دەرەكتەر مول. سانكت- پەتەربور ارحيۆىندە ءۇش اي جۇمىس ىستەپ، ءبىراز مالىمەت اكەلدىم. الايدا، وندا يمپەراتورلىق دەگەن ءبولىم بار، وتە قۇپيا. وعان كىرگىزبەيدى. سونداعى مالىمەتتەردى الۋىمىز كەرەك»، - دەيدى تاريحشى.
ونىڭ ايتۋىنشا، تۇركيا مۇراعاتتارىندا قازاققا قاتىستى دەرەكتەر تىم از. ولار وزدەرىندە بار قازاق حاندىعى مەن وسمان يمپەرياسى اراسىنداعى بايلانىستارعا قاتىستى ارحيۆ قۇجاتتارىن قازاقستان تاراپىنا بەرگەن.
«ال قىتاي ارحيۆتەرىندە عۇن، ساق، ءۇيسىن، قاڭلى، تۇركى قاعاناتى تۋرالى مالىمەتتەر وتە كوپ. ونى الۋ ءۇشىن كەلىسىم كەرەك، سونداي- اق ءتىل ءبىلۋىمىز قاجەت. ەلباسىمىزدىڭ «ارحيۆ-2025» جوباسى اياسىندا وسى مالىمەتتەردى تەز ارادا العانىمىز ءجون. وسىعان جۇمىلا كىرىسىپ، اسىرا ماقتاي بەرمەي شىندىقتى جازۋىمىز كەرەك. سوندا قازاق حالقىنىڭ الەمدىك ورنى ايقىندالا تۇسەدى دەپ ويلايمىن»، - دەدى عالىم.