مەملەكەت باسشىسى ازات پەرۋاشيەۆتى قابىلدادى

 استانا. قازاقپارات - نۇرسۇلتان نازاربايەۆ پارلامەنت ءماجىلىسىنىڭ دەپۋتاتى، «اق جول» دەموكراتيالىق پارتياسى فراكسياسىنىڭ جەتەكشىسى ازات پەرۋاشيەۆتى قابىلدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

كەزدەسۋ بارىسىندا مەملەكەت باسشىسىنا «اق جول» دەموكراتيالىق پارتياسى مەن ونىڭ پارلامەنت ماجىلىسىندەگى فراكسياسىنىڭ جۇمىسى جونىندە مالىمەت بەرىلدى.

قازاقستان پرەزيدەنتى «اق جول» دەموكراتيالىق پارتياسىنىڭ مەملەكەتتىك ساياساتتى جۇزەگە اسىرىپ، ونىڭ نەگىزگى باسىمدىقتارىن حالىققا ءتۇسىندىرۋ ىسىندەگى ءرولىن ەرەكشە اتاپ ءوتتى.

- ءسىز ەلىمىزدەگى تاجىريبەلى پارلامەنت دەپۋتاتتارىنىڭ ءبىرى رەتىندە ۇزاق جىلداردان بەرى «اق جول» پارتياسىنا باسشىلىق ەتىپ كەلەسىز. پارتيالارىڭىز ناقتى جۇمىستار اتقارۋدا. مەملەكەتتىڭ جۇرگىزىپ جاتقان ساياساتىنا قولداۋ ءبىلدىرىپ، حالىق بىرلىگىن نىعايتۋ جولىندا زور ۇلەس قوسىپ كەلەسىزدەر، - دەدى ەلباسى.

ا. پەرۋاشيەۆ پارتيا فراكسياسىنىڭ بيىلعى جولداۋدىڭ نەگىزگى باعىتتارىن ورىنداۋ، سونىڭ ىشىندە «بيزنەستىڭ جول كارتاسى-2020»، «يندۋستريالىق- يننوۆاتسيالىق دامۋ» باعدارلامالارىن ودان ءارى جۇزەگە اسىرۋعا جانە وتاندىق بيزنەستى قولداۋ ماقساتىمەن قابىلداناتىن شارالارعا قاتىستى ۇسىنىستار ەنگىزۋ جونىندەگى جۇمىستارىن اتاپ ءوتتى.