اناسى ديماش قۇدايبەرگەننىڭ ءتىل-كوزدەن قالاي قورعاناتىنىن ايتتى

 استانا. قازاقپارات - ديماش قۇدايبەرگەننىڭ اناسى لوندوننىڭ تورىندە وتكەن ۇلىنىڭ كونسەرتىنەن كەيىن اقتوبەگە ۇشىپ كەلدى.

سۆەتلانا ايتبايەۆا 46 ەلدىڭ جانكۇيەرلەرى ەرەكشە كۇتىپ العان ساپاردان قانداي اسەرمەن ورالعانىن ايتتى دەپ حابارلايدى وڭىردەگى NUR. KZ ءتىلشىسى.

«ەۋروپا ەلىندەگى ديماشتىڭ تۇڭعىش كونسەرتىنەن ۇلكەن اسەرمەن ورالدىق. العاشىندا جوسپارلانعانداي، كونسەرتتەن تۇسكەن قارجى قازاقستانداعى جاس تالانتتاردى قولداۋعا جۇمسالادى. وسىعان دەيىن ديماشتىڭ كونتسەرتىندە شەتەلدىك نە قازاقستاندىق انشىلەر شىققان ەمەس. ديماش ەكى ساعاتتان اساتىن كونسەرتتەردى ءوزى بەرەتىن. بۇل جولى ءبارى باسقاشا ءوتتى. ديماشتىڭ تۋعان قالاسىنان مەكتەپ وقۋشىسى لوندوندا ءان سالدى»، - دەيدى ءانشىنىڭ اناسى سۆەتلانا ايتبايەۆا.

اقتوبەدەگى «باقىتتى بالا» بايقاۋىنىڭ گران پري يەگەرى نارقىز جانۇزاقوۆا ۇلى بريتانيا استاناسىندا ديماشپەن بىرگە ءان سالعان بولاتىن.

قازاق ەلىن الەمگە تانىتقان ءانشىنىڭ اناسى شەتەلدىك جانكۇيەرلەر جاساعان توسىن سىي تۋرالى دا ايتىپ بەردى.

«ديماشتىڭ 46 ەلدەن كەلگەن جانكۇيەرلەرى تەمزا وزەنىنىڭ بويىنا فان كەزدەسۋ ۇيىمداستىرىپ، ءبىزدى قوناق رەتىندە شاقىردى. جىلى لەبىزگە تولى كەش وتە اسەرلى ءوتتى. ديماشپەن بىرگە ءان ايتقان جەرلەسىنە تەمزا وزەنىن كورسەتتى. لوندوندا وتكەن كونسەرت ۇلى بريتانيا كورولدىگى جانە قازاقستان مادەنيەت مينيسترلىگىنىڭ قولداۋىمەن ءوتتى»، - دەيدى سۆەتلانا ايتبايەۆا.

سونىمەن قاتار، الەمدى مويىنداتقان ءانشىنىڭ اناسى ۇلىنىڭ ءتىل-كوزدەن قالاي قورعاناتىنىن دا ايتىپ بەردى.

«ارينە، ءتىل-كوزدەن ساقتانۋ كەرەك. ديماش تۇزدى سۋعا جۋىنادى. اراسىندا اجەسى تۇيرەۋىش قاداپ قويادى. ءوزىنىڭ تاعاتىن تۇمارلارى بار. ساحناعا شىعار الدىندا مىندەتتى تۇردە سۇرەلەر وقيدى. كەز كەلگەن كونسەرت نە بايقاۋدىڭ الدىندا قۇرانى مەن سۇرەسىن وقىپ شىعادى»، - دەيدى اناسى.

اناسى تۋعان جەرىن ساعىنىپ جۇرگەن ديماشتىڭ الداعى كۇندەرى BBC تەلەارناسىنا سۇقبات بەرەتىندىكتەن سول جاقتا كىدىرەتىندىگىن جەتكىزدى. جۇمىس جوسپارى تىعىز ءانشىنى ەندى ماسكەۋدە وتەتىن كونسەرت كۇتىپ تۇر.

ايتا كەتەيىك، 19- قاراشا كۇنى ديماش قۇدايبەرگەنوۆتىڭ لوندون تورىندە دۇركىرەتىپ كونسەرت وتكىزگەن بولاتىن.