دانيار ەلەۋسىنوۆتىڭ كەزەكتى ايقاسى تىكەلەي ەفيردە كورسەتىلەدى

بۇل تۋرالى اتالعان تەلەارنانىڭ رەسمي سايتى ءمالىم ەتتى.

اتالعان حابارلامادا «موناكودان تىكەلەي كورسەتىلىمدى «حابار» ارناسى كورسەتەدى. 24- قاراشا كۇنى ساعات 01:00 دە شارشى الاڭداعى تارتىستى كەزدەسۋدى وتكىزىپ الماڭىزدار!»، - دەپ جازىلعان.

قازاقستاندىق بوكسشىنىڭ قارسىلاسى - نيكاراگۋالىق ماركوس موحيكا (16-2-2، 12 ك و).

جەكپە-جەك سەگىز راۋندتان تۇرادى. ەلەۋسىنوۆتىڭ بۇعان دەيىنگى ءتورت جەكپە-جەگى دە التى راۋندتان بولعان.

ەلەۋسىنوۆ - موحيكا جەكپە-جەگى قاراشانىڭ 24 نەن 25 نە قاراعان ءتۇنى «كازينو دە مونتە-كارلوداعى» بوكس كەشىندە بولادى. بۇل كەشتىڭ باستى جەكپە-جەگىندە العاشقى اۋىر سالماقتاعى بۇرىنعى الەم چەمپيونى رەسەيلىك دەنيس لەبەديەۆ (31-2، 23 ك و) امەريكالىق مايك ۋيلسونمەن (19-0، 8 ك و) جۇدىرىقتاسادى.

ەسكە سالا كەتەيىك، دانيار ەلەۋسىنوۆ 20- قازاندا بوستونداعى (ا ق ش) TD Garden ارەنادا امەريكاندىق بوكسشى مەتت دوەرتيمەن (8-6-1، 4 ك و) كەزدەسىپ، قارسىلاسىن ءبىرىنشى راۋندتا تەحنيكالىق نوكاۋتپەن جەڭگەن بولاتىن.

اۆتور: كۇنسۇلتان وتارباي