وتباسى قۇندىلىقتارىن دارىپتەيتىن «شاشۋ» تەلەحيكاياسى كورەرمەنگە جول تارتتى

الماتى. قازاقپارات - اۋىل ءومىرى مەن وتباسى قۇندىلىقتارىن ارقاۋ ەتكەن «شاشۋ» كومەديالىق تەلەسەريالى كورەرمەنگە جول تارتتى، دەپ حابارلايدى قازاقپارات ءتىلشىسى.

«شاشۋ» - 32 سەريالىق قازاقستاندىق جوبا. تەلەحيكايا وتباسى قۇندىلىقتارى مەن تۇكپىردەگى اۋىل تىرشىلىگىن كورەرمەندى كۇلدىرە وتىرىپ جەتكىزەدى. باس كەيىپكەرلەر - ارمان مەن ايدا شەتەلدە وقىپ ءجۇرىپ تانىسىپ، وتاۋ قۇرعان. ارمان - دارىگەر، ال ايدا - ءسان ديزاينەرى. ەكەۋىنىڭ الان اتتى 10 جاسار ۇلى بار. ون جىلدان بەرى ا ق ش- تا تۇراتىن ەرلى- زايىپتىلاردىڭ ءومىرى كۇرت وزگەرىپ، ولار قازاقستانعا ورالۋعا ءماجبۇر بولادى. ويتكەنى ارماننىڭ اناسى ناۋات اپا قىزدارىمەن بىرگە تۇرۋدان باس تارتىپ، جالعىز ۇلىن كۇتۋدە. ول بالاسىنىڭ ءوز ەركىمەن اۋىلعا قايتقىسى كەلمەيتىنىن ءتۇسىنىپ، ۇلى مەن كەلىنىن ەلگە قايتارۋ ءۇشىن جوسپار قۇرادى.

فيلمگە ءاليحان ىدىرىسوۆ، قۋاندىق شاكىرجانوۆ، ايگۇل كادەن، ەدىل رامازانوۆ، گۇلشات تۇتوۆا، ەسجان حاميدۋللين سەكىلدى تانىمال اكتەرلەر تۇسكەن. سونىمەن قاتار، جاس بۋىننان ءالي مارات، ماقپال قاسەنوۆا، ارحات قايرات ۇلى بار. رەجيسسەرى - ەرنات بايۇزاق، ستسەناريي اۆتورى - ءجاميت كوشەربايەۆ.

 تەلەحيكايانى «حابار» اگەنتتىگىنىڭ تاپسىرىسىمەن «5 ستۋديا TV Production  » تۇسىرگەن.