الداعى ءۇش كۇندە ەلىمىزدە قار جاۋىپ، كۇشتى جەل سوعادى

استانا. قازاقپارات - سينوپتيكتەر الداعى 22-24- قاراشا كۇندەرىنە ارنالعان اۋا رايى بولجامىن جاريا ەتتى، دەپ حابارلايدى قازاقپارات قازگيدرومەتكە سىلتەمە جاساپ.

«بۇل كۇندەرى قازاقستاننىڭ سولتۇستىك، ورتالىق، شىعىس جانە باتىس وبلىستارىندا قار جاۋىپ، قاتتى جەل سوعادى، كوكتايعاق كۇتىلەدى. مۇنداي كۇردەلى مەتەورولوگيالىق جاعداي باتىس سىبىردەگى بەلسەندى تسيكلونمەن بايلانىستى اتموسفەرالىق اعىنداردىڭ ءوتۋى كەزىندە بايقالادى»، - دەلىنگەن «قازگيدرومەت» حابارلاماسىندا.

رەسپۋبليكانىڭ وڭتۇستىك جانە وڭتۇستىك-شىعىس وبلىستارىندا جاۋىن-شاشىن كۇتىلەدى. مۇندا وڭتۇستىك تسيكلوننىڭ ىقپالىمەن جاۋىن-شاشىن، جاڭبىر، قار ارالاس جاڭبىر كۇتىلەدى، ال 24- قاراشادا تاۋلى ايماقتاردا قار جاۋىپ، تۇمان تۇسەدى. كوكتايعاق بولۋى ىقتيمال جانە باتىستان كۇشتى، ەكپىندى جەل سوعادى.