ديماش رەسەي پۋبليكاسىن باۋراپ الادى - كومپوزيتور يگور كرۋتوي

استانا. قازاقپارات - قازاقستاندىق ءانشى ديماش قۇدايبەرگەن ماسكەۋدەگى كرەمل ساحناسىندا ءان سالىپ، «ن ت ۆ» ارناسىنىڭ «ورتالىق تەلەۆيدەنيە» باعدارلاماسىندا قوناقتا بولدى، دەپ حابارلايدى قازاقپارات.

رەسەيگە بارعانى تۋرالى ءانشى ينستاگرام پاراقشاسىندا جازدى. «ن ت ۆ» ارناسىنداعى «ورتالىق تەلەۆيدەنيە» باعدارلاماسىندا ماەسترو يگور كرۋتويمەن بىرگە العاشقى دۋەتتىڭ تۇساۋكەسەرى ءوتتى»، - دەدى د. قۇدايبەرگەن.

بىرەگەي تەمبرىمەن الەم حالقىن تامساندىرعان ديماشتى وسىلايشا، تاعى ءبىر رەسەيلىك ارنا مويىنداپ وتىر. شوۋدى ازىرلەگەندەر ءانشىنىڭ داۋىسىنىڭ قۇپياسىن اشپاق بولادى. رەسەي شوۋ-بيزنەسىنىڭ نارىعىنا باتىل قاداممەن ەنگەن ءانشى باعدارلاما سوڭىندا كومپوزيتور يگور كرۋتويدىڭ سۇيەمەلدەۋىمەن «قالجىراعان اققۋلاردىڭ سەزىمى» (ليۋبوۆ ۋستاۆشيح لەبەدەي) ءانىن ورىنداپ، كوپشىلىكتىڭ قوشەمەتىنە بولەندى.

«وسى اننەن كەيىن سەن سويلەي الاسىڭ با؟»، - دەپ سۇرادى تاڭدانىسىن جاسىرا الماعان باعدارلاما جۇرگىزۋشىسى ديماشتان. ءوز كەزەگىندە كومپوزيتور يگور كرۋتوي ديماشتىڭ «رەسەي پۋبليكاسىن باۋراپ الاتىنىن» ايتىپ ءوتتى.

كەيىن ديماش اتالمىش ءاندى ماسكەۋدەگى كرەمل سارايىندا رەسەي فەدەراتسياسىنىڭ ىشكى ىستەر ورگاندارىنىڭ قىزمەتكەرلەرى كۇنىنە ارنالعان كونسەرتتە شىرقادى.

ايتا كەتەرلىگى، «قالجىراعان اققۋلاردىڭ سەزىمى» ءانىن كومپوزيتور يگور كرۋتوي مەن اقىن ميحايل گۋتسەريەۆ ايگىلى فرانسۋز ءانشىسى لارا فابيان ءۇشىن جازعان بولاتىن.

ەسكە سالا كەتسەك، بۇعان دەيىن ديماش قۇدايبەرگەننىڭ ورىنداۋىنداعى «Screaming» انىنە تۇسىرىلگەن بەينەبايان رەسەيلىك «مۋز-ت ۆ» ارناسىندا كورەرمەندەردىڭ ەڭ كوپ داۋىسىنا يە بولىپ، «مۋزراسكرۋتكا» باعدارلاماسىندا كوش باستاعان بولاتىن. ال وسى ايدىڭ 19 ىندا ديماشتىڭ لوندونداعى جەكە كونسەرتى وتەدى. قازىرگى تاڭدا لوندون ورتالىعىنداعى ەكرانداردا قازاقستاندىق ءانشىنىڭ كونسەرتى جارنامالانىپ جاتىر.