اقتاۋدا كاسپي تەڭىزىنىڭ مارتەبەسى تاعى تالقىلاندى

اقتاۋ. قازاقپارات - قازاقستان مەن رەسەي سەناتورلارى كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانى راتيفيكاتسيالاۋ ماسەلەسىن تالقىلادى، دەپ حابارلايدى قازاقپارات ءتىلشىسى.

اقتاۋدا وتكەن قازاقستان رەسپۋبليكاسىنىڭ پارلامەنتى سەناتى مەن رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ ىنتىماقتاستىق جونىندەگى كوميسسياسىنىڭ 13-وتىرىسىندا كاسپيدىڭ ەكولوگياسى، تۋريزمدى دامىتۋ جانە جاعالاي جاتقان ەلدەردىڭ ساۋدا قاتىناسى مەن ارىپتەستىگىن نىعايتۋ ماسەلەلەرى قارالدى. جيىنعا يران يسلام رەسپۋبليكاسىنىڭ وكىلدەرى دە كەلدى.

«قۇجاتتا تەڭىزدىڭ سۋتابانى، تابيعي رەسۋرستار، اۋە كەڭىستىگى، قۇبىرلار مەن كابەلدەر توسەۋ، تەڭىزدىڭ بيولوگيالىق رەسۋرسىن قورعاۋ سياقتى ماسەلەلەر قاراستىرىلعان. كاسپي - بەيبىتشىلىكتىڭ ورداسى بولۋى ءتيىس. 5 ەل ءوزارا ءتيىمدى ديالوگ ورناتۋى قاجەت. مۇندا وزگە مەملەكەتتەردىڭ قارۋلى كۇشتەرىنە ورىن جوق، سەبەبى ءبىز دوستىقتى قولدايمىز. ەكولوگيا جاقسارىپ، ينۆەستيتسيا تارتىلادى. ترازنيت سياقتى وزەكتى سۇراقتار بار»، - دەدى ق ر سەناتى ءتوراعاسىنىڭ ورىنباسارى سەرگەي گروموۆ.

ماڭىزدى جيىندا ماڭعىستاۋ وبلىسى اكىمىنىڭ ورىنباسارى شولپان ىلمۇحانبەتوۆا ايماقتىڭ الەۋەتىن تانىستىردى.

«وبلىس - ترانزيتتىك حابقا اينالدى. اقتاۋ پورتى مەن قۇرىق پورتى ارقىلى جىلىنا 10 ميلليون تونناداي جۇك تاسىمالدانادى. ورتا ازيا مەن ەۋروپاعا قاراي جول اشتىق. سونداي-اق، اقتاۋ اۋەجايى دا ماڭىزدى سيپاتقا يە. جىلىنا 850 مىڭ جولاۋشى اتتانادى. 7 ىشكى باعىتتا، 14 سىرتقى باعىتتا رەيستەر بار. تاعى دۋبايعا باعىت اشۋ جوسپارلانعان»، - دەدى شولپان ىلمۇحانبەتوۆا.