استانادا وتكەن «شابىت» فەستيۆالىندە شەرحان مۇرتازا اتىنداعى ارناۋلى سىيلىق تابىستالدى
«بايقاۋدىڭ شارتى بويىنشا ءبىرىنشى كەزەڭدە استانا تۋرالى ماقالا جازىپ جىبەردىم. ىرىكتەۋ كەزەڭىنەن سۇرىنبەي ءوتىپ، ەكىنشى كەزەڭگە جولداما الدىم. ەكىنشى كەزەڭنىڭ تاپسىرماسى «شابىت» فەستيۆالى تۋرالى شىعارما جازۋ. وداندا ءوتىپ ناتيجەسىندە شەراعامىزدىڭ قۇرمەتىنە ارنالعان سىيلىقتى جەڭىپ الدىم، جاس جۋرناليست رەتىندە مەن ءۇشىن بۇل ۇلكەن جەتىستىك. جالپى شەر اعامىزدىڭ شىعارماشىلىعىن وقۋشى كۇنىمنەن جانىما جاقىن تۇتامىن، ونىڭ ىشىندە ارينە «قىزىل جەبە» تۋىندىسىنىڭ ورنى بولەك»، - دەدى جەڭىمپاز، «ايقىن» رەسپۋبليكالىق گازەتىنىڭ ءتىلشىسى دينارا تىلەۋبەك.
ايتا كەتەيىك، «شابىت» حالىقارالىق فەستيۆالىندە اراعا بىرنەشە جىلدار سالىپ بيىل «جۋرناليستيكا» نوميناتسياسى قايتا تاعايىندالدى. اتالعان سالا بويىنشا بايقاۋعا بارلىق سانى 48 جۇمىس كەلىپ ءتۇستى.
اتالعان سالا بويىنشا ءادىلقازىلار القاسىنىڭ شەشىمىمەن شەرحان مۇرتازانىڭ قۇرمەتىنە ارناۋلى سىيلىق تاعايىندالدى. ال، جارىستىڭ جۇلدەسىنە كەلسەك، باستى سىيلىق - پرەزيدەنت كوبۋگى، 10 گران-پري، سونداي-اق 13 I، Ⅱ جانە Ⅲ ورىندار جانە 15 اتاۋلى سىيلىق تابىس ەتىلدى.
حالىقارالىق ونەر باسەكەسىندە جالپى سانى 345 ۇمىتكەر باعىن سىنادى، تەك قانا استانانىڭ وزىنەن 163 ۇمىتكەر قاتىستى، ودان بولەك ازەربايجان، بەلارۋس، باشقۇرتستان، گرۋزيا، يزرايل، قىرعىزستان، رەسەي، ۋكراينا جانە وزبەكستان ەلدەرىنىڭ ونەرپازدارى قاتىستى.
بۇعان دەيىن حابارلاعانىمىزداي، حالىقارالىق «شابىت» فەستيۆالىنىڭ پرەزيدەنت كۋبوگىن «كلاسسيكالىق مۋزىكا» نوميناتسياسى بويىنشا قاتىسقان ەلوردالىق يسلام اليەۆ يەلەندى.