قازاقستاندىق سامبوشى الەم چەمپيونى اتاندى

استانا. قازاقپارات - قازاقستاندىق سامبوشى نۇربول سەرىكوۆ رۋمىنيا استاناسى بۋحارەستە ەرلەر مەن ايەلدەر اراسىندا ءوتىپ جاتقان الەم چەمپيوناتىنىڭ جەڭىمپازى اتاندى، دەپ حابارلايدى قازاقپارات ءتىلشىسى.

دۇنيەجۇزىلىك دودانىڭ العاشقى كۇنى قارسىلاس شىداتپاعان نۇربول 68 كەلى سالماقتا فينالدا ازەربايجان ەلىنىڭ وكىلى ەميل گاسانوۆپەن كىلەمگە شىقتى.

اسا تارتىستى بەلدەسۋ 1:1 ەسەبىمەن تەڭ اياقتالدى. دەگەنمەن سوڭعى ۇپايدى قازاقستاندىق پالۋان العاندىقتان، جەڭىس نۇربولعا بەرىلدى. تاعى ءبىر قازاقستاندىق سەرىكجان ءتۇسىپوۆ اسكەري سامبودان 57 كەلى سالماقتا قولا جۇلدەگە يە بولدى.

ب ق و دەنە شىنىقتىرۋ جانە سپورت باسقارماسىنان الىنعان مالىمەتكە قاراعاندا، 25 جاستاعى نۇربول سەرىكوۆ 1993-جىلى قازتالوۆ اۋدانى اقپاتەر اۋىلىندا دۇنيەگە كەلگەن. العاشقى باپكەرى - جەڭىس ستامعازيەۆ. ورال قالاسىنداعى سپورتقا دارىندى بالالارعا ارنالعان مامانداندىرىلعان وبلىستىق مەكتەپ- ينتەرناتىنىڭ تۇلەگى ن. سەرىكوۆ قازىرگى كەزدە قازاقستاننىڭ ەڭبەك سىڭىرگەن جاتتىقتىرۋشىسى رايبەك مەڭدىعاليەۆتىڭ قول استىندا دايىندالىپ ءجۇر.

ايتا كەتەيىك، بۋحارەستەگى الەم چەمپيوناتىندا قازاقستان قۇراماسى ساپىندا ب ق و- دان تەمىرلان كولباي (+100 كەلى)، سونداي-اق اسكەري سامبودان قازبەك سۇپىعاليەۆ (62 كەلى) پەن تەمىرلان يحسانعاليەۆ (82 كەلى) كىلەمگە شىعادى.

الەم بىرىنشىلىگى 11- قاراشا كۇنى مارەگە جەتەدى. ايتا كەتەيىك، الداعى اپتادا سامبو كۇرەسىنىڭ شىققانىنا تۋرا 80 جىل تولعالى وتىر.