استانادا «شابىت» فەستيۆالىنىڭ پرەزيدەنت كۋبوگى يەگەرى بەلگىلى بولدى
ودان بولەك، جەڭىمپاز «كلاسسيكالىق مۋزىكا: اعاش ۇرمەلى اسپاپتار» اتالىمىنىڭ گران-ءپريىن جەڭىپ الدى، دەپ حابارلايدى قازاقپارات ءتىلشىسى.
وسىمەن 21-رەت ۇيىمداستىرىلىپ، 5 كۇنگە سوزىلعان ونەر باسەكەسى ءوز مارەسىنە جەتتى. استاناداعى «بەيبىتشىلىك جانە كەلىسىم» سارايىندا وتكەن بايقاۋ جەڭىمپازدارى مەن جۇلدەگەرلەرىن قۇتتىقتاۋ راسىمىمەن قاتار، جەڭىمپازداردىڭ قاتىسۋىمەن گالا-كونسەرت ۇيىمداستىرىلدى.
«مۋزىكامەن 7 جاسىمنان باستاپ اينالىسامىن. قازىر استاناداعى ونەر ۋنيۆەرسيتەتىنىڭ مۋزىكا فاكۋلتەتىنىڭ 3- كۋرس ستۋدەنتىمىن. جەڭىسىمدى اتا-اناما ارنايمىن. «شابىت» فەستيۆالىنە وسىمەن 2-رەت قاتىسۋىم. وسىدان ەكى جىل بۇرىن وسى نوميناتسيادا Ⅲ ورىن يەلەندىم»، - دەدى فەستيۆالدىڭ ءابسوليۋتتى جەڭىمپازى، پرەزيدەنت كۋبوگىنىڭ يەگەرى يسلام اليەۆ.
«كلاسسيكالىق مۋزىكا» اتالىمىندا قاتىسۋشىلار 4 سەكتسيادا شەبەرلىك بايقاستى: اعاش جانە مىس ۇرمەلى اسپاپتار، سوقپالى اسپاپتار جانە كامەرالىق انسامبلدەر.
مەيىرجان كەڭەسبايەۆ، ايا عابباسوۆا، لەونيد مىسوۆسكي، باعجان ەسىركەپ ەنگەن كۆارتەت ۇزدىك كامەرالىق انسامبل (گران-پري) دەپ تانىلدى.
«كلاسسيكالىق مۋزىكا: مىس ۇرمەلى اسپاپتار» سەكتسياسىندا ازات ءابىلقاسىموۆ توپ جاردى. اعاش اسپاپتاردا ويناۋدا تىلەك ءداۋىتقان مەن ۆلاديمير ارداشەۆ كوش باستاسا، «سوقپالى اسپاپتا» ارىستان ءابىلدين گران-پري يەلەندى.
ۇستىمىزدەگى جىلى «حالىق مۋزىكاسى» نوميناتسياسى كەلەسى سەكتسيالاردان قۇرىلدى: «قوبىز»، «پريما-قوبىز»، «دومبىرا-پريما، شەرتەر، باس-شەرتەر». بايقاۋ قورىتىندىسى بويىنشا شولپان شاراپاتوۆا ۇزدىك قوبىزشى اتانىپ، گران-پري ەنشىلەدى. «دومبىرا-پريما، شەرتەر، باس- شەرتەر» اتالىمىندا گران-پري ءادىلحان گودجانوۆقا بۇيىردى.
«پريما- قوبىزدا» قازىلار القاسى ايىم مەيىرحانوۆانىڭ ونەرىنە جوعارى باعاسىن بەردى. فەستيۆالدىڭ ۇزدىك ۆوكاليسى گران-ءپريىن استانالىق احمەت سۇلتان يەلەندى. «حورەوگرافيا» اتالىمىندا گران-پري قازىلار القاسىنىڭ ءبىراۋىزدان قابىلداعان شەشىمىمەن ەلوردالىق «ناز» ءبي تەاترىنا بەرىلدى.
جۋرناليستيكا نوميناتسياسى بويىنشا قازاقستان ۇلتتىق تەلەارناسىنىڭ «ماسەلە» باعدارلاماسىنىڭ جۇرگىزۋشىسى، جۋرناليست نارتاي سارسەنعاليەۆتىڭ باعى جاندى.
حالىقارالىق ونەر بايقاۋىنىڭ پرەزيدەنت كۋبوگى يەگەرى، گران-پري يەگەرلەرى مەن جۇلدەلى ورىن العاندار اقشالاي سىيلىقتارمەن جانە «شابىت» فەستيۆالىنىڭ ديپلومدارىمەن ماراپاتتالدى. ونىڭ ىشىندە، پرەزيدەنت كۋبوگى جۇلدەسىنە - 600 مىڭ تەڭگە، گران-پري - 350 مىڭ تەڭگە، ءبىرىنشى ورىن - 300 مىڭ تەڭگە، ەكىنشى ورىن - 250 مىڭ تەڭگە جانە ءۇشىنشى ورىنعا 200 مىڭ تەڭگە بەرىلدى.
سونىمەن قاتار، اتاۋلى سىيلىق يەگەرلەرىنە 80 مىڭ تەڭگە كولەمىندە سىياقى تابىستالدى. بۇعان دەيىن حابارلاعانىمىزداي، كۇندىز بايقاۋدىڭ I، II، Ⅲ ورىن يەگەرلەرى ماراپاتتالعان بولاتىن.