رۋمىنيادا قازاق فيلمدەرى كورسەتىلدى

استانا. قازاقپارات - ترانسيلۆانيانىڭ تاريحي ورتالىعى، رۋمىنيانىڭ كلۋج- ناپوكا قالاسىندا «رۋحاني جاڭعىرۋ» - «جاھاندىق الەمدەگى زاماناۋي قازاقستاندىق مادەنيەت» باعدارلاماسى شەڭبەرىندە قازاق كينوسىنىڭ ەكىنشى فەستيۆالى ءوتتى، دەپ حابارلايدى قازاقپارات «قازاق فيلم» كينوستۋدياسىنا سىلتەمە جاساپ.

مادەني ءىس-شارانى ش. ايمانوۆ اتىنداعى «قازاق فيلم» كينوستۋدياسى، قازاقستاننىڭ رۋمىنياداعى ەلشىلىگى مەن ق ر كلۋج- ناپوكا قالاسىنىڭ قۇرمەتتى كونسۋلدىعىمەن بىرلەسىپ ۇيىمداستىرىپ وتىر.

فەستيۆال شەڭبەرىندە ش. ايمانوۆ اتىنداعى «قازاق فيلم» كينوستۋدياسىندا جارىق كورگەن «جاۋجۇرەك مىڭ بالا»، «اناعا اپارار جول»، «قۇنانباي»، «ورالمان» جانە «جاڭعاق تال» فيلمدەرى كورسەتىلدى.

فەستيۆالدىڭ اشىلۋ سالتاناتىندا قازاقستاننىڭ رۋمىنياداعى ەلشىسى داۋلەت باتىراشيەۆ ءسوز سويلەپ، رۋمىن اۋديتورياسىن وتاندىق كينويندۋستريا ونىمدەرىمەن تانىستىرۋ شاراسى ەكى ەلدىڭ مادەني- گۋمانيتارلىق ىنتىماقتاستىعىنىڭ دامۋىنا جانە حالىقتارى اراسىندا رۋحاني جاقىنداسۋىنا ىقپالىن تيگىزەتىنىن ايتتى.

فەستيۆالگە ايگىلى وتاندىق اكتەر اسىلحان تولەپوۆ قاتىسىپ، كورەرمەندەرگە «جاۋجۇرەك مىڭ بالا» ءفيلمىنىڭ ءتۇسىرىلۋى تۋرالى ايتىپ بەردى. اكتەر بۇل ءىس- شارا رۋمىن كورەرمەندەرىنە قازاق حالقىنىڭ تاريحى، مادەنيەتى جانە داستۇرىمەن جاقىن تانىسۋىنا مۇمكىندىك بەرەتىنىن اتاپ ءوتتى.

سونداي-اق فەستيۆالگە جەرگىلىكتى تۇرعىندار، قوعامدىق قايراتكەرلەر، ۇكىمەت، ىسكەر جانە اكادەميالىق ورتا وكىلدەرى، سونداي- اق، كلۋج- ناپوكا قالاسىندا وقىپ جۇرگەن قازاقستاندىق ستۋدەنتتەر قاتىستى. ولار قازاق كينوفەستيۆالى قالانىڭ مادەني ومىرىندە ەرەكشە قۇبىلىس بولعانىن ايتىپ، رۋمىنيانىڭ بىرىگۋىنە ءجۇزجىلدىق مەرەيتويى قارساڭىندا ءوتىپ جاتقانىن اتاپ ءوتتى.

ايتا كەتسەك، قازاق كينوسىنىڭ فەستيۆالى رۋمىنيانىڭ تاعى دا ءبىر ءىرى قالاسى - كونستانسادا ءوتتى. بۇل كورسەتىلىمدە «قازاق حاندىعى: الماس قىلىش»، «ستالينگە سىيلىق»، «ءبىرجان سال» جانە «جات» فيلمدەرى حالىق نازارىنا ۇسىنىلدى.

كونستانسا مۋنيسيپاليتەتىنىڭ جانە وبلىستىق اكىمشىلىكتىڭ وكىلدەرى، ەكى ەلدىڭ حالىقتارىن جاقىنداستىرۋ ماقساتىندا وسىنداي مادەني ءىس- شارالاردى وتكىزۋدىڭ ماڭىزدىلىعىن اتاپ ءوتتى. رۋمىن مادەنيەت قايراتكەرلەرى قازاقستان مەن رۋمىنيا ارتىستەرىنىڭ قاتىسۋىمەن بىرلەسكەن قويىلىمدار وتكىزۋ تۋرالى ۇسىنىستارىن ايتتى.

شاراعا رۋمىندىق ىسكەرلىك ورتا، بۇقارالىق اقپارات قۇرالدارى، قازاق دياسپوراسى وكىلدەرى جانە قالا تۇرعىندارى قاتىستى. وتاندىق فيلمدەرمەن شابىتتانعان رۋمىن كورەرمەندەرى قازاقستاندىق رەجيسسەرلەردىڭ جۇمىسىنىڭ جوعارى دەڭگەيىن باسا ايتىپ، قازاقستاندىق كينو مەكتەبىن ەرەكشە باعالادى.

ەستەرىڭىزگە سالا كەتەيىك، رۋمىنيادا قازاق كينوسىنىڭ ءبىرىنشى فەستيۆالى 2017 -جىلى قاراشادا ايىندا وتكىزىلىپ، قازاقستان مەن رۋمىنيا اراسىنداعى ديپلوماتيالىق قاتىناستاردىڭ 25 جىلدىق مەرەيتويىنا ورايلاستىرىلعان بولاتىن.