داۋرەن ابايەۆ «كوكجايلاۋ» تاۋ كۋرورتى قاجەت ەكەنىن ايتتى

استانا. قازاقپارات - بۇگىنگى تاڭدا قازاقستاندا تاۋ كۋرورتىنا دەگەن سۇرانىس ارتىپ كەلەدى. «شىمبۇلاققا» كەلۋشىلەردىڭ شامادان تىس كوبەيۋى دە وسىنى راستايدى.

«حابار» تەلەارناسىنداعى «اشىق اڭگىمە» باعدارلاماسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ وسىنداي پىكىر ايتتى، دەپ حابارلايدى قازاقپارات ءتىلشىسى.

سۇحبات كەزىندە داۋرەن ابايەۆ «شىمبۇلاق» تاۋ كۋرورتىنا كەلۋشىلەر شامادان تىس ارتۋىنا جانە وسىنداي كۋرورتتارعا دەگەن سۇرانىستىڭ جوعارى بولۋىنا بايلانىستى، الماتىدا تاعى ءبىر كۋرورت سالۋ قاجەت بولىپ وتىرعانىن ايتتى.

«بۇگىنگى تاڭدا ءبىز تۋريزمدى دامىتۋ ءۇشىن قولدا بار رەكرەاتسيالىق مۇمكىندىكتەردى پايدالانۋعا ءتيىسپىز. تۋريزمنىڭ الەمدىك جالپى ىشكى ونىمدەگى ۇلەسى 10 پايىزدان اسادى، بۇل 8 تريلليون دوللار دەگەن ءسوز. ءبىز تۋريستەر ءۇشىن كۇرەسۋىمىز كەرەك. قالا ماڭىندا ورنالاسقان تاۋلار - الماتىنىڭ باستى ارتىقشىلىعى»، - دەدى مينيستر.

الماتىدا كۋرورت سالۋ ماسەلەسى ءالى تالقىلانىپ جاتىر، ال كورشى ەلدەر تاۋ- شاڭعى يندۋسترياسىن قارقىندى دامىتۋعا كۇش سالۋدا.

«ماسەلەن، وزبەكستاندا 100 ميلليون دوللاردان استام ينۆەستيتسيا قۇيۋ ارقىلى ۇلكەن كۋرورت اشىلماق. قىرعىزستاننىڭ قاراكول اۋدانىندا ۇلكەن ەكى كۋرورت سالىنىپ جاتىر. ازەربايجاندا ەندى عانا اشىلعان تاۋ- شاڭعى كۋرورتىنا 100 مىڭ ادام بارىپ ۇلگەردى»، - دەدى د. ابايەۆ.

مينيسترلىك باسشىسى 2014 -جىلى ۇسىنىلعان تاۋ- شاڭعى كۋرورتىنىڭ ءبىرىنشى جوباسىندا تابيعات لاندشافتىن ءبىرشاما وزگەرتۋ كوزدەلگەنىن، نەگىزىنەن قالتالى شەتەلدىكتەرگە ارنالعانىن ەسكە سالدى.

بۇدان تىس، د. ابايەۆ وسى جوبانى ىسكە اسىرۋ كەزىندە بارلىق ەكولوگيالىق ماسەلەلەر ەسكەرىلەتىنىنە سەنىم ءبىلدىردى.

«قازىر اكىمدىك قۇرىلىس ماسەلەسىن قايتا قاراپ شىقتى. جىل بويى جۇمىس ىستەيتىن، جۇرتتىڭ بارىنە قولجەتىمدى كۋرورت سالۋ جوسپارلانىپ وتىر. تراسسانىڭ جوسپارداعى ۇزىندىعى قىسقاردى، عيماراتتاردىڭ اۋماعى شامامەن 10 ەسە كىشىرەيدى. وسىنىڭ ءبارى ەكولوگياعا اسەردى ازايتادى»، - دەپ تۇيىندەدى مينيستر.