گەنۋيانىڭ قاق ورتاسىندا ابايدىڭ ءانىن شىرقاعاندار جۇرتتى ءتانتى ەتتى

 استانا. قازاقپارات - يتاليانىڭ گەنۋيا قالاسىنىڭ قاق ورتاسىنداعى كارلو فەليچە تەاترىنىڭ الدىندا ەلىمىزدىڭ ونداعان ونەرپازى ۇلتتىق كيىممەن ابايدىڭ «ايتتىم سالەم، قالامقاس» ءانىن ورىندادى.

فلەشموب يتاليالىقتاردىڭ تاڭدانىسىن تۋعىزعان دەپ حابارلايدى NUR. KZ.

گەنۋيا تۇرعىندارى مەن قوناقتارى قازاقستاندىق ونەرپازداردىڭ انىنە دۋ قول شاپالاقتاپ، ونى جارىسا ۆيدەوعا ءتۇسىرىپ جاتتى.

فلەشموبتى قازاقستاندىقتار كەزدەيسوق ۇيىمداستىرعان. ولار ءان شىرقاپ جاتقاندا، باسقالارى تەاتر باعدارلاماسىن كورەرمەندەرگە تاراتىپ ۇلگەرىپتى.

«بۇل استانا وپەرانىڭ ونەرپازدارى عوي! «اباي»، مىنا جەردە نە جازىلعانىن قاراشى، ماسسيمو»، - دەيدى يتاليالىق ايەل جانىنداعى ەر ازاماتقا.

8- قاراشا كۇنى تەتار ارتىستەرى بۇدان دا كوپ حالىقتى جيناپ ونەر كورسەتۋدى جوسپارلاپ وتىر. ولار «اباي» وپەراسىن العاش رەت اتاقتى كارلو فەليچە تەاترىندا قويادى.

بيلەتتەر اپتا بۇرىن ساتىلىپ كەتكەنىنە قاراپ، 2000 ورىندىق زال حالىققا لىق تولادى دەپ كۇتىلۋدە. «اباي» قويىلىمىن بارىنشا كوپ ادام تاماشالاۋى ءۇشىن ونى الەمنىڭ 40 ەلىندە ەكران ارقىلى كورسەتەتىن بولادى.



وسى قويىلىم ءۇشىن استانادان گەنۋياعا 380 ادام ارنايى كەلگەن. ونىڭ ىشىندە انشىلەر، حور، بالەت، وركەستر، ميمانس، كوستيۋمەر، بەت ارلەۋشى مەن تەحنيكالىق ماماندار دا بار.

وپەرانىڭ دەكوراتسياسىن يتالياعا جەتى جۇك كولىگىمەن جەتكىزگەن.

ايگىلى تەاتر باسشىلىعى قازاقستان وپەراسىنا جوعارى باعا بەرىپ، قويىلىم حالىقتىڭ كوڭىلىنەن شىعادى دەگەن سەنىمدە.

فلەشموب سوڭىندا قازاقستاندىق ونەرپازدار ەلدىڭ ءانۇرانىن تەبىرەنە شىرقادى. قالىڭ توپقا جينالعان ارتىستەر اراسىندا سۇندەت بايعوجين، مايرا مۇحامەد قىزى، نۇرلان بەكمۇحامبەتوۆتەر دە بوي كورسەتتى. ولار «اباي» وپەراسىنداعى باستى پارتيانى ورىندايدى.

ايتا كەتەيىك، سيمفونيالىق وركەسترگە - ايگىلى كومپوزيتور، لاتيف حاميديمەن بىرگە وسى وپەرانى جازىپ شىعارعان احمەت جۇبانوۆتىڭ شوبەرەسى الان بورىبايەۆ ديريجەرلىق ەتەدى.