قىتايدا روزا باعلانوۆانىڭ شىعارماشىلىعىنا ارنالعان مۇراعاتتىق ديسكى جارىققا شىقتى

قىزىلوردا. قازاقپارات - الداعى ۋاقىتتا روزا باعلانوۆا ورىنداعان مۋزىكالىق تۋىندىلار جيناقتالعان مۇراعاتتىق ديسكى جارىق كورەدى، دەپ حابارلايدى قازاقپارات ءتىلشىسى.

قىزىلوردادا حالىق قاھارمانى روزا باعلانوۆا اتىنداعى رەسپۋبليكالىق «اق ماڭدايلىم» انشىلەر بايقاۋى وتكەن ەدى. بەلگىلى ءانشىنىڭ اتالمىش شاراعا ارنايى كەلگەن بالاسى تاجەن باعلانوۆ اتالمىش جاعىمدى جاڭالىقتى جەتكىزدى.

«ءبىز بۇعان دەيىن دە مۋزىكالىق شىعارمالار جيناقتالعان ديسكىنى جارىققا شىعاردىق. ول قىتايدا از عانا تارالىممەن جاسالدى. بۇل دۇنيە تەز ارادا ءوز تىڭداۋشىسىن تاۋىپ ۇلگەردى. قازىر بۇل باعىتتا تاعى دا جۇمىس جاساپ جاتىرمىز. روزا باعلانوۆانىڭ شىعارماشىلىعىنا ارنالعان ديسكىنى كەلەسى جىلى جۇرتشىلىق نازارىنا ۇسىناتىن بولامىز»، - دەدى تاجەن باعلانوۆ.

سونداي-اق، ول بۇدان بۇرىن الماتى قالاسىندا روزا باعلانوۆا جونىندە ورىس تىلىندە ءومىرباياندىق كىتاپتىڭ تۇساۋكەسەرى وتكەنىن تىلگە تيەك ەتتى. كىتاپ قازاقشادان ورىس تىلىنە اۋدارىلعان.

«قازاق تىلىندەگى كىتاپ 2007-جىلى جارىققا شىقتى. ءبىز ونى ورىس تىلىنە اۋدارۋعا شەشىم قابىلدادىق. ورىس ءتىلدى وقىرماندار روزا باعلانوۆا ءومىرىنىڭ جارقىن ساتتەرىن اڭگىمەلەگەن دۇنيەدەن حاباردار بولسىن دەگەن نيەت تانىتتىق. بۇرىن اتالمىش كىتاپ از تارالىممەن وقىرمان قولىنا ءتيدى. ەندىگى كەزەكتە تارالىم سانىن دا ۇلعايتۋعا نازار اۋداردىق»، - دەدى تاجەن باعلانوۆ.

ەستەرىڭىزگە سالا كەتەلىك، 6-7- قاراشا كۇندەرى  قىزىلوردا وبلىسىندا حالىق قاھارمانى روزا باعلانوۆا اتىنداعى رەسپۋبليكالىق «اق ماڭدايلىم» انشىلەر بايقاۋى ءوتتى.