گرەكيادا «ازىرەت سۇلتان» قورىق-مۋزەيىنىڭ تاريحي كورمەسى وتەدى
بۇل تۋرالى اتالعان قورىق-مۋزەيدىڭ باسپا ءسوز قىزمەتى حابارلادى.
«ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ حالىقارالىق كورمەگە قاتىسۋىنا ق ر مادەنيەت جانە سپورت مينيسترلىگى قولداۋ كورسەتىپ وتىر جانە اتالعان شارا 9-11- قاراشا كۇندەرى وتەدى.
وسى ورايدا «ازىرەت سۇلتان» مەملەكەتتىك تاريحي-مادەني قورىق-مۋزەيى قوجا احمەت ياساۋيدىڭ مۇرالارى جانە تۇركىستان وڭىرىندەگى كيەلى-تاريحي جەرلەردى الەمدىك جەتەكشى تۋريستىك ورتالىقتار نازارىنا ۇسىنادى. كورمەگە قورىق-مۋزەي قورىنان 1871-1872-جىلدارى تۇسىرىلگەن ا. كۋننىڭ فوتوالبومىنان تۋىندىلار جانە كەسەنەنىڭ ءار جىلدارداعى بەينەلەرى مەن تۇركىستاننىڭ كورىنىستەرى، تايقازان، شىراعدان سۋرەتتەرى، قوجا احمەت ياساۋي مەن تايقازاننىڭ ماكەتتەرى كوپشىلىك نازارىنا ۇسىنىلادى.
سونداي-اق، ياساۋي كەسەنەسى مەن قىلۋەت جەراستى مەشىتى، شىعىس مونشاسى، گاۋحار انا، ۋكاشا اتا كەسەنەسى مەن قۇدىعى، ساۋران قالاشىعى سىندى تاريحي ورىنداردىڭ 3D تۋر نۇسقاسى ەلباسىمىزدىڭ سيفرلاندىرۋ جۇيەسى نەگىزىندە دايىندالىپ، حالىقارالىق كورمەدە العاش رەت كورسەتىلىپ، كوزىلدىرىك ارقىلى تانىستىرىلادى دەپ كۇتىلۋدە.
سونىمەن قاتار، قورىق-مۋزەيدىڭ تاريحي ورىندارى مەن مۋزەي حاقىندا ءۇش تىلدە جارىق كورگەن بۋكلەت كىتاپشالارى مەن جادىگەرلەردىڭ كاتالوگ كىتاپتارى كورمە ەكسپوزيتسياسىنان ورىن الماق.
ايتۋلى شارا اياسىندا قازاقستاننىڭ ۇلتتىق تاعامدارى مەن «اسىق اتۋ»، «ارقان تارتۋ» سىندى ۇلتتىق ويىندارى دا كورسەتىلەدى.
ايتا كەتسەك، بۇعان دەيىن «ازىرەت سۇلتان» مەملەكەتتىك تاريحي-مادەني قورىق-مۋزەيى تۇركسوي حالىقارالىق ۇيىمىنىڭ قولداۋىمەن تۇركيا رەسپۋبليكاسىندا دا كورمە ۇيىمداستىرىپ، ءبىرقاتار ءىرى قالالارىنا ياساۋي مۇرالارىن ناسيحاتتاعان بولاتىن.
ەۋروپالىق مادەنيەتتىڭ دامۋىنا ۇلكەن اسەر ەتە وتىرىپ تۋريزم سالاسى دامىعان، اسەم لاندشافتى ارالدارعا باي گرەك ەلىندەگى ساپار ەلباسى نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن كەڭىنەن ناسيحاتتاۋ جانە «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ 40 جىلدىعى، تۇركىستان قالاسىنىڭ وبلىس ورتالىعى اتانۋىنا دا ارنالعان. قورىق-مۋزەي باسشىسى احمەتجانوۆ نۇربولات قادىر ۇلى باستاعان دەلەگاتتار گرەكياعا جاسالعان ساپار بارىسىندا ءبىرقاتار تۋريستىك كەلىسسوزدەر جۇرگىزىپ، مادەني-تاريحي مۇرالاردى دارىپتەيدى.