موڭعولياداعى ەڭ ۇلكەن كيىز ءۇي گيننەستىڭ رەكوردتار كىتابىندا ەنگىزىلدى

استانا. قازاقپارات - موڭعوليانىڭ «سەلنەن» كومپانياسىنىڭ شەبەرلەرى جاساعان الىپ كيىز ءۇي گيننەستىڭ رەكوردتار كىتابىندا ەنگىزىلدى، دەپ حابارلايدى قازاقپارات مونتسامە اگەنتتىگىنە سىلتەمە جاساپ.

كيىز ءۇي ەلدىڭ شىعىسىنداعى دورنوگوۆ ايماعىنىڭ قاتىنبۇلاق اۋىلىنداعى حانگي- ماندال باقىلاۋ- وتكىزۋ پۋنكتىنىڭ ماڭىنا قۇرىلعان. 36 قاناتتى كيىز ءۇيدىڭ جالپى اۋدانى 1 مىڭ شارشى مەتردەي بولادى. الىپ وردا ءبىر ۋاقىتتا شامامەن 500 ادامدى سىيدىرا الادى. كيىز ءۇيدىڭ بيىكتىگى 14 مەتر، بۇل ءۇشقاباتتى عيماراتتىڭ بيىكتىگىمەن بىردەي.

كيىز ءۇيدىڭ باستى ەرەكشەلىگى - موڭعولدىڭ ءداستۇرلى ديزاينى مەن ءۇيدى ازىرلەۋ ادىستەرىنىڭ ساقتالۋى. ۇلكەن بولعانىنا قاراماستان، كيىز ءۇيدىڭ ءتورت باعاناسى بار. كيىز ءۇي شەتەلدىك تۋريستەردى تارتۋ ماقساتىندا پايدالانىلاتىن بولادى.

ەسكە سالا كەتسەك، قىزىلوردا وبلىسىنىڭ قازالى اۋدانىنداعى باعبان جۇزىممەن كومكەرىلگەن كيىز ءۇي جاسادى. سونىمەن قاتار، قوستانايلىق مۇعالىم «اقىلدى» كيىز ءۇي جاساپ شىققان بولاتىن.