تاعى ءبىر ۆيتسە-ءمينيسترى قارجى جىمقىرۋ كۇدىگىنە ىلىكتى
بۇل تۋرالى ق ر باس پروكۋرورى قايرات قوجامجاروۆ ءمالىم ەتتى، دەپ حابارلايدى قازاقپارات.
«زاڭ تاراپىنان جاقىندا ەنەرگەتيكا ۆيتسە-ءمينيسترى قىزمەتىنە تاعايىندالعان شكارۋپاعا قاتىستى شاعىم بار. وسىعان دەيىن ساران قالاسى اكىمى لاۋازىمىندا بولعان. ول 2015 -جىلى قاراعاندى وبلىسى ساراندا جىلۋدى ەسەپتەۋ قۇرىلعىلارىن ورناتۋعا بولىنگەن 215 ميلليون تەڭگەنى جىمقىرۋعا قاتىسى بار دەگەن كۇدىككە ىلىكتى. ەسەپتەۋىش قۇرالدار بوس قابىرعالارعا ورناتىلعان. اتالعان فاكتى بويىنشا ءبىز قىلمىستىق ءىستى تەرگەۋگە كىرىستىك»، - دەدى ق. قوجامجاروۆ اقوردادا وتكەن قاۋىپسىزدىك كەڭەسى وتىرىسىندا.
ەستەرىڭىزگە سالا كەتەيىك، اناتولي شكارۋپا بيىلعى 9 -قازاندا ق ر ەنەرگەتيكا ۆيتسە-ءمينيسترى لاۋازىمىنا تاعايىندالعان بولاتىن.
بۇدان بۇرىن حابارلانعانداي، قاۋىپسىزدىك كەڭەسىنىڭ وتىرىسىندا مەملەكەت باسشىسى نۇرسۇلتان نازاربايەۆ تاريفتەردى زاڭسىز كوتەرگەن مونوپوليستەردى جازالاۋدى تالاپ ەتتى.