استانادا «الاش تۋى استىندا» دەرەكتى فيلمىنىڭ تۇساۋى كەسىلدى

استانا. قازاقپارات - استانادا ق ر مادەنيەت جانە سپورت مينيسترلىگىنىڭ تاپسىرىسىمەن تۇسىرىلگەن «الاش تۋى استىندا» دەرەكتى فيلمىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.

1918 -جىلدىڭ 8-23 -قىركۇيەگى ارالىعىندا ۋفا قالاسىندا مەملەكەتتىك ءماجىلىس ءوتتى. سول وتىرىستا الاش قايراتكەرلەرى ۇلت- ازاتتىق كۇرەس مۇددەسىن زاڭدى تۇردە قورعاۋدىڭ ۇلگىسىن كورسەتتى.

اتالعان دەرەكتى فيلم الاشوردانىڭ 100 جىلدىعىنا وراي ارنايى ۇيىمداستىرىلىپ وتىر.

فيلمنىڭ جۇمىس توبى الاش قايراتكەرلەرىنىڭ ىزىمەن سەمەيدىڭ الاش قالاسى اتالعان اۋماعىندا، ماسكەۋدەگى كرەمل، سانكت- پەتەربۋرگتەگى دۋما وتىرىستارى وتكەن تاۆريا سارايىندا، سمولنىيدا، سانكت- پەتەربۋرگ، قازان ۋنيۆەرسيتەتىندە، ۋفاداعى مەملەكەتتىك ءماجىلىس وتكەن بۇرىنعى «ءسىبىر» قوناقۇيىندە ءتۇسىرۋ جۇمىستارىن جۇرگىزدى.

دەرەكتى تۋىندى «ويان، قازاق!»، «جاريالانباعان اۆتونوميا» جانە «قاتەرلى وتكەل» سەكىلدى ءۇش بولىمنەن تۇرادى.

«بۇگىنگى تاريحي ءفيلمنىڭ تۇساۋكەسەرىن ايتۋلى وقيعا دەۋگە بولادى. ءبىزدىڭ تاريح تولقىنىمىزدىڭ قۋانىشتى كۇندەرمەن قوسا قايعىلى ساتتەرى دە بار. پاتشا وكىمەتى مەن كەڭەس زامانىندا الاش قايراتكەرلەرى قازاق ەلىنىڭ تۇتاستىعىن ويلاپ ءجۇرىپ وزدەرى قۇربان بولدى جانە كوپتەگەن ەل دامۋىنداعى جوسپارلارىن جۇزەگە اسىرا المادى. بۇل فيلم الاش ارداقتىلارىنىڭ قۇرمەتىنە جانە الاشوردانىڭ 100 -جىلدىعىنا وراي ارنايى تاپسىرىسپەن ءتۇسىرىلدى»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.

مينيستر ءسوز سوڭىندا دەرەكتى فيلمنىڭ ءتۇسىرىلىم توبىنا، ونىڭ ىشىندە فيلم جۇمىسىنا تىكەلەي قاتىسقان «ەل» پروديۋسەرلىك ورتالىعىنا العىسىن ءبىلدىردى.

بۇعان دەيىن حابارلاعانىمىزداي، كەشە ا. مۇحامەدي ۇلى استانالىقتاردى فيلمنىڭ تۇساۋكەسەرىنە شاقىرعان بولاتىن.

فيلمنىڭ رەجيسسەرى - ەرگەن توقمۋرزين، باس كەڭەسشىسى - مامبەت قويگەلدى، شىعارماشىلىق كەڭەسشىسى - تۇرسىنجان شاپاي، سەناريدىڭ اۆتورى - بولات ءمۇرسالىم، قويۋشى وپەراتورى - مۇستافا ونەر جانە كومپوزيتورى - بەيبىت اقوش.

«فيلم رەسەيدىڭ 4 قالاسىندا ءتۇسىرىلدى. ءىرى قالالاردا فيلم ءتۇسىرۋ وڭاي ەمەس ەكەنىن كينو سالاسىنداعى ازاماتتار جاقسى بىلەدى. كرەملدە، بۇرىنعى سمولنىي، دۋمادا ءتۇسىرىلىم جۇرگىزۋ ءۇشىن ارنايى اككرەديتاتسيا الۋ قاجەت. رۇقسات الۋ ءۇشىن ءتىپتى 1 جىلداي ۋاقىت كەتەدى ەكەن، الايدا قازاقستاننىڭ رەسەيدەگى ەلشىسى يمانعالي تاسماعامبەتوۆ باستاعان ەلشىلىك قىزمەتكەرلەرى بىزگە ۇلكەن قولداۋ ءبىلدىردى»، - دەدى فيلم سەناريىنىڭ اۆتورى ءارى جۇرگىزۋشىسى بولات ءمۇرسالىم.

ايتا كەتەيىك، فيلم ش. ايمانوۆ اتىنداعى «قازاق فيلم» اق جانە «ەل» پروديۋسەرلىك ورتالىعىمەن بىرلەسىپ ءتۇسىرىلدى.