دايىن تۇرعان ۇيلەر حالىققا بەرىلمەي وتىر - پرەمەر-مينيستر

استانا. قازاقپارات - ق ر پرەمەر-ءمينيسترى باقىتجان ساعىنتايەۆ جاڭا تۇرعىن ۇيلەردى ينفراقۇرىلىممەن قامتۋ ماسەلەسىن كوتەردى، دەپ حابارلايدى قازاقپارات ءتىلشىسى.

بۇگىنگى ۇكىمەت وتىرىسىندا ق ر ينۆەستيسيالار جانە دامۋ ءمينيسترى جەڭىس قاسىمبەك «نۇرلى جەر» مەملەكەتتىك تۇرعىن ءۇي قۇرىلىسى باعدارلاماسىنىڭ بيىلعى ىسكە اسىرىلۋ بارىسى تۋرالى باياندادى.

پرەمەر- مينيستر 9 ايدىڭ قورىتىندىسى بويىنشا باعدارلامانىڭ بارلىق باعىتىندا ءوسىم بار ەكەنىن، دەگەنمەن ءبىرقاتار ماڭىزدى ماسەلەلەرگە نازار اۋدارۋ قاجەتتىگىن ايتتى.

«ءبىرىنشى ماسەلە - قاراجاتتى يگەرۋ. باياندامادا ايتىلعانداي، ءبىرقاتار وڭىرلەردە 9-ايدىڭ قورىتىندىسى بويىنشا قاراجاتتى يگەرۋ قارقىنى تومەن. الىپ وتىرعان جوسپارىمىز - 12,1 ميلليون شارشى مەتر. بىلتىرمەن سالىستىرعاندا %10- عا جوعارى. ال جىلدىڭ اياقتالۋىنا 2 اي عانا قالدى. قۇرمەتتى ارىپتەستەر، اكىم مىرزالار، تۇرعىن ءۇيدىڭ جوسپارلانعان كولەمىن تاپسىرۋ جانە بولىنگەن قاراجاتتى ءتيىمدى يگەرۋ ءۇشىن قاجەتتى شارالاردىڭ بارلىعىن قابىلداۋدى تاپسىرامىن»، - دەدى پرەمەر-مينيستر ۇكىمەت وتىرىسىندا.

سونىمەن بىرگە، ساعىنتايەۆ ينجەنەرلىك كوممۋنيكاتسيالاردى قۇرىلىس الاڭدارىنا جەتكىزۋ ماسەلەسىن كوتەردى.

«بۇل، نەگىزىنەن، كوپپاتەرلى ۇيلەرگە جانە جەكە ءۇي قۇرىلىسىنا قاتىستى. بيىل مەملەكەتتىك باعدارلامانى ىسكە اسىرۋعا بولىنگەن بيۋدجەت قاراجاتىنىڭ جارتىسىنا جۋىعى وسىعان كوزدەلگەن. كەي وڭىرلەردە قاجەتتى ينفراقۇرىلىم بولماعاندىقتان سالىنىپ، دايىن تۇرعان ۇيلەر پايدالانۋعا بەرىلمەي وتىر»، - دەدى ول.

مىسال رەتىندە پرەمەر-مينيستر دايىن تۇرعان، ءبىراق ينفراقۇرىلىمى جوق نىسانداردى اتاپ كورسەتتى.

«پەتروپاۆلداعى «بەرەكە» شاعىناۋدانىندا بەس قاباتتى 3 ءۇي بار. 230 پاتەر 2017 -جىلدىڭ قاراشا- جەلتوقسانىندا، ءبىر جىل بۇرىن سالىنىپ بىتكەن. ءبىراق بەرىلمەي وتىر. ينفراقۇرىلىم جوق. سەمەيدە 10 قاباتتى 3 ءۇي 2017 -جىلى قاراشا- جەلتوقساندا سالىنعان. اقتوبەدەگى «نۇر اقتوبە» شاعىناۋدانى 2018 -جىلدىڭ تامىز ايىندا سالىنعان. شىمكەنتتە «تۇلپار» شاعىناۋدانىندا 3 قاباتتى 8 ءۇي 2018 -جىلدىڭ ءساۋىر- تامىز ايلارىندا سالىنعان. ءبىراق ينفراقۇرىلىمى جوق»، - دەدى ب. ساعىنتايەۆ.

قۇرىلىسى اياقتالۋعا جاقىن قالعان وبەكتىلەر قاراعاندىدا، وسكەمەندە، ورالدا، سەمەيدە بار. ولاردىڭ قۇرىلىسى قاراشا-جەلتوقسان ايلارىندا بىتەدى دەپ جوسپارلانعان. الايدا بۇل جەرلەرگە دە ينفراقۇرىلىم تارتىلماعان جانە اباتتاندىرىلماعان.

«بۇعان باسا نازار اۋدارۋ قاجەت. جەكە تۇرعىن ءۇي بويىنشا بيىل 40 مىڭنان استام جەر ۋچاسكەسى ينفراقۇرىلىممەن قامتىلۋى ءتيىس. الايدا 9 ايدىڭ قورىتىندىسى بويىنشا ءتيىستى جەر تەلىمدەرىنىڭ %40 ى عانا قامتاماسىز ەتىلگەن. اكىمدەر جىل سوڭىندا بەلگىلەنگەن مەجەگە جەتەمىز دەپ وتىر. مۇنى قاتاڭ باقىلاۋعا الۋ كەرەك»، - دەدى باقىتجان ساعىنتايەۆ.