قارقارالىدا تۋريزمدى دامىتۋدىڭ الەۋەتى جوعارى - اكىم

قاراعاندى. قازاقپارات - ءوز قالالارىنداعى ماسەلەلەر جايلى قارقارالى تۇرعىندارى ايتىپ بەردى. بۇل تۋرالى قازاقپارات اكىمدىكتىڭ سايتىنا سىلتەمە جاساپ حابارلايدى.

اۋداندىق اكتيۆ جينالىسىندا كارىز، سۋمەن قامتۋ جانە جولدارعا قاتىستى سۇراقتار كوتەرىلدى. كاسىپكەرلەر تۋريزمدى دامىتۋدا جانە شاعىن نەسيە الۋعا كومەكتەسۋدى سۇرادى.

«مەن بارلىقتارىڭىزدى اۋداندا بار ماسەلەلەردى تالقىلاۋ ءۇشىن جينادىم. بۇل كەزدەسۋ ەركىن فورماتتا ءوتسىن. بارلىق نيەت بىلدىرۋشىلەر سۇراقتارىن قويا الادى. مۇندا مەنىڭ ورىنباسارلارىم مەن باسقارما باسشىلارى بار، ولار ناقتى جاۋاپتارىن ايتادى»، - دەدى ايماق باسشىسى وتىرىستى اشۋ بارىسىندا.

 قارقارالى تۇرعىنى سەرىك جاكەيەۆ قالا دامىپ كەلە جاتقانىن ايتتى.

«جىل سايىن تۇرعىندار سانى ارتىپ كەلەدى. قازىرگى تاڭدا قارقارالىدا 1800-گە جۋىق وتباسى تۇرىپ جاتىر. ادامدار شالعايداعى اۋىلداردان كوشىپ كەلىپ، ۇيلەرىن سالىپ جاتىر. جانە دە وسىعان بايلانىستى بىزدە ەكى ماسەلە تۋىنداپ وتىر - كارىز جانە سۋمەن قامتۋ جۇيەلەرى. تابيعي ساياباقتىڭ جانىندا ۇڭعىما بار. ول جەردەن قالانىڭ % 80  تۇرعىندارى سۋ الىپ وتىر. الايدا قالعاندارىندا سۋمەن قامتۋعا قاتىستى قيىندىقتار بار. ازىرگە بۇل ماسەلە شەشىلمەي تۇر» - دەپ ءتۇسىندىردى سەرىك جاكەيەۆ.

«سۋمەن قامتۋ جۇيەسىنە ءبىز قاراجات بولدىك، ءبىراق سىزدەر ونى مەڭگەرە المادىڭىزدار. ەندى مىنە، تۇرعىندار ورىندى ماسەلەنى كوتەرىپ وتىر...»، - دەدى ەرلان قوشانوۆ اۋدان اكىمى حالەل ماقسۇتوۆقا.

«2013 -جىلدان بەرى ءبىز ءۇش رەت ءوتىنىش بەردىك. ءبىراق باستاپقىدا قاجەتتى سوما 1,5 ميلليارد تەڭگەنى قۇراعان بولاتىن، ال قازىر ول 2,5 ميلليارد تەڭگەگە دەيىن كوتەرىلىپ كەتتى. سۋمەن قامتۋ ءۇشىن ج س ق دايىن تۇر. ءبىز سۋ قۇبىرىن جارلى اۋىلى ارقىلى تارتامىز. گەولوگيالىق- توپوگرافيالىق جۇمىستاردى ەسكەرە وتىرىپ، اۋداندىق بيۋدجەتتەن 7,5 ميلليون تەڭگە بولىنگەن. مەردىگەر انىقتالعان، جۇمىستار اياقتالۋعا جاقىن»، - دەپ ەسەپ بەردى اۋدان اكىمى.

ەرلان قوشانوۆ سونىمەن قاتار، ەنەرگەتيكا جانە ت ك ش باسقارماسىنىڭ جەتەكشىسى ۇلانتاي ۇسەنوۆكە: «بۇل ماسەلەلەردى بارىنشا شۇعىل تۇردە شەشۋ كەرەك» دەپ تاپسىرما بەردى.

اۋداندا تۋريزم سالاسىن دامىتۋ الەۋەتىنە ەرلان قوشانوۆ ەرەكشە نازار اۋداردى. ول قارقارالى قازاقستاننىڭ توپ-50 ۇزدىك تۋريستىك جەرلەرى رەيتينگىنە ەنگەنىن ەسكە سالدى.

 «ۇزدىك وندىقتار قاتارىنا ەنۋ ءۇشىن ينفراقۇرىلىمدى جاقسارتىپ، جولداردى جوندەۋ قاجەت. تۋريزم دامىعان سوڭ قارقارالى اۋدانىندا ءومىر جاقسارادى. جۋىرداعى جولداۋىندا ەلباسى قازاقستاندىقتاردىڭ ءال- اۋقاتىن جاقسارتۋعا ەرەكشە نازار اۋدارۋ كەرەكتىگىن ايتتى. ءبىز بارلىعىمىز وسى باعىتتا جۇمىس ىستەۋىمىز كەرەك»، - دەپ اتاپ ءوتتى ەرلان قوشانوۆ.