تولىقمەتراجدى «كۇلتەگىن» انيماتسيالىق فيلمىنىڭ ترەيلەرى جاريالاندى
ق ر مادەنيەت جانە سپورت مينيسترلىگىنىڭ تاپسىرىسى بويىنشا جارىققا شىققان بۇل تۋىندى جالپى ۇلتتىق پروكاتقا قاراشانىڭ 22-نەن باستاپ جاس كورەرمەندەرگە جول تارتادى.
جاس رەجيسسەر- انيماتور اداي ءابىلدانىڭ قولىنان شىققان اتالمىش تاريحي انيماتسيالىق تۋىندى كوشپەندى حالىقتاردىڭ باسىن بىرىكتىرىپ، ۇلى كوشپەندىلەردىڭ ءداستۇرىن جالعاستىرعان تۇرىك قاعاناتىنىڭ داڭقتى اسكەري قولباسشىسى كۇلتەگىننىڭ جاستىق شاعى تۋرالى باياندايدى.
««كۇلتەگىن» فيلمى اتا- بابالارىمىزدىڭ جانقيارلىق ەرلىگى، بىرلىگى مەن اۋىزبىرشىلىگى تۋرالى. كۇلتەگىن- بۇل تۇتاس ءبىر ءداۋىردىڭ تاريحي تۇلعاسى. سوندىقتان دا ءبىزدىڭ باستى ماقساتىمىز - سول كەزدەگى مادەنيەتتى اشىپ كورسەتۋ عانا ەمەس، سونىمەن قاتار مۋلتيپليكاتسيا ارقىلى جاس كورەرمەندەرىمىزدىڭ تاريحقا دەگەن قىزىعۋشىلىعىن ارتتىرۋ،» - دەدى اداي ءابىلدا.
جاس ۇرپاقتى مەيىرىمدى، قايىرىمدى بولۋعا، سونىمەن قاتار وتاندى سۇيۋگە تاربيەلەۋدى الدىنا ماقسات قويعان رەجيسسەر اداي ءابىلدانىڭ وسىعان دەيىن دە تۇسىرگەن قىسقامەتراجدى فيلمدەرى كوپتەگەن حالىقارالىق فەستيۆالدەردە كورسەتىلىپ، جۇلدەلى ورىنداردان كورىنگەن.
«وكىنىشكە قاراي، بۇگىندە وتاندىق تەلەارنالار نەگىزىنەن بالالارىمىزعا تەرىس تاربيە بەرەتىن شەتەلدىڭ مۋلتفيلمدەرىن كورسەتىپ ءجۇر. سوڭعى كەزدەرى بالالاردى مەيىرىمدىلىككە شاقىراتىن مۋلتفيلمدەر جوقتىڭ قاسى. ول فيلمدەردە ادەمى اشىق بوياۋلار دا، جارىلىستار دا، قىزىقتى كەيىپكەرلەر دە بار، ءبىراق ەڭ باستىسى - ءمان- ماعىناسى جوق. بۇنداي ءۇردىستى توقتاتۋ قاجەت. ءوزىمىزدى ۇلتتىق كەيىپكەرلەرىمىز كەرەك،» - دەدى رەجيسسەر.
«كۇلتەگىن» انيماتسيالىق فيلمىنىڭ ترەيلەرىن مىنا سىلتەمەدەن كورۋگە بولادى.
اۆتور: ايان بەكەن ۇلى
