ارىستانبەك مۇحامەدي ۇلى استانالىقتاردى الاش جايلى دەرەكتى فيلمنىڭ تۇساۋكەسەرىنە شاقىردى

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى استانالىقتاردى «الاش تۋى استىندا» دەرەكتى فيلمنىڭ تۇساۋكەسەرىنە شاقىردى.

دەرەكتى فيلمنىڭ تۇساۋكەسەرى 6- قاراشا كۇنى ساعات 19:00 «سارىارقا» كينوتەاترىندا وتەدى، دەپ حابارلايدى قازاقپارات ءتىلشىسى.

دەرەكتى فيلمدى كورۋگە كىرۋ تەگىن. ارنايى كورسەتىلىم دە ەرتەڭ سول جەردە بولادى. فيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» ا ق «ەل» پروديۋسەرلىك ورتالىعىمەن بىرلەسە وتىرىپ تۇسىرگەن.

«فيلمدى ءتۇسىرۋ توبى الاش قايراتكەرلەرىنىڭ ىزىمەن سەمەيدىڭ الاش قالاسى اتالعان اۋماعىندا، ماسكەۋدەگى كرەمل، سانكت-پەتەربۋرگتەگى دۋما وتىرىستارى وتكەن تاۆريا سارايىندا، سمولنىيدا، سانكت-پەتەربۋرگ، قازان ۋنيۆەرسيتەتىندە، ۋفاداعى مەملەكەتتىك ءماجىلىس وتكەن بۇرىنعى «ءسىبىر» قوناق ۇيىندە ءتۇسىرۋ جۇمىستارىن جۇرگىزدى.

فيلمنىڭ رەجيسسەرى - ەرگەن توقمۋرزين، باس كەڭەسشىسى - مامبەت قويگەلدى، شىعارماشىلىق كەڭەسشىسى - تۇرسىنجان شاپاي، سەناريدىڭ اۆتورى - بولات ءمۇرسالىم، قويۋشى وپەراتورى - مۇستافا ونەر جانە كومپوزيتورى - بەيبىت اقوش»، - دەپ جازدى مينيستر فەيسبۋكتەگى پاراقشاسىندا.

ارىستانبەك مۇحامەدي ۇلى قازاقستاندىقتاردىڭ فيلمدى قايدان كورە الاتىنى تۋرالى ماسەلەنى شەشىپ جاتقانىن تىلگە تيەك ەتتى.

«كينوتەاتردا دەرەكتى كينو كورسەتىلمەيتىنى بەلگىلى، سوندىقتان مەملەكەتتىك تەلەارنالاردان كورسەتۋ مۇمكىندىگىن قاراستىرامىز. بۇل تۋرالى مىندەتتى تۇردە قوسىمشا حابارلايمىن»، - دەپ جازدى ول.

ەسكە سالا كەتسەك، «الاش تۋى استىندا» اتتى دەرەكتى فيلم تۇسىرىلگەنىن بۇعان دەيىن حابارلاعان بولاتىنبىز.