استانادا «شابىت» حالىقارالىق فەستيۆالى باستالدى
اتالعان فەستيۆال ونەر سالاسىنداعى ايتۋلى وقيعا جانە تالانتتى جاستارعا ءوز ونەرىن بارشاعا پاش ەتىپ، ۇلكەن ساحناعا جول اشاتىن بىرەگەي الاڭ.
5-9- قاراشا ارالىعىندا وتەتىن ونەر باسەكەسىندە دارىندى جاستار «كلاسسيكالىق مۋزىكا»، «حالىق مۋزىكاسى»، «ەسترادالىق ۆوكال»، «حورەوگرافيا» جانە «جۋرناليستيكا» نوميناتسيالارى بويىنشا باق سىنايدى.
بايقاۋعا تەك قانا استانانىڭ وزىنەن 163 ۇمىتكەر قاتىسۋدا، ودان بولەك شەتەلدەن ازەربايجان، بەلارۋس، باشقۇرتستان، گرۋزيا، يزرايل، قىرعىزستان، رەسەي، ۋكراينا جانە وزبەكستان ەلدەرىنىڭ وكىلدەرى باق سىناۋدا.
«وزدەرىڭىز بىلەتىندەي ەلباسى جاستار شىعارماشىلىعىنىڭ جۇيەلى تۇردە دامۋىنا باسا نازار اۋدارادى. الداعى جىل جاستار جىلى رەتىندە اتالىپ وتىلەتىنىنە وراي، بۇگىندە جاستارعا باعىتتالعان ءتۇرلى سالالار بويىنشا كەشەندى باعدارلامانى ازىرلەۋدەمىز. «شابىت» فەستيۆالى ەلوردامىزدىڭ قۇرداسى جانە استانامەن بىرگە ونىڭ دا شىعارماشىلىق اۋقىمى كەڭەيىپ كەلەدى. فەستيۆال ونەر سالاسىنداعى تالاي جانداردىڭ باعىنىڭ جانۋىنا سەبەپ بولدى جانە سول ءداستۇر جالعاسا بەرەدى»، - دەدى استانا قالاسىنىڭ اكىمىنىڭ ورىنباسارى ەرمەك امانشايەۆ.
ەلوردا اكىمى ورىنباسارىنىڭ سوزىنە دالەل، ءار جىلدارى فەستيۆال گران-پريى تانىمال ازىلكەش تۇرسىنبەك قاباتوۆقا، اقىن قالقامان سارينگە، بالەت ءارتىسى ايگەرىم بەكەتايەۆاعا، وپەرا ءانشىسى ايگۇل نيازوۆاعا، «مەلومەن» توبىنا، اشا ماتايعا، بەلگىلى ءانشى ءارى كومپوزيتور قايرات باەكەنوۆكە جانە باسقا دا ونەر جۇلدىزدارىنا تابىستالعان بولاتىن.
حالىقارالىق ونەر بايقاۋىنىڭ گران-پري يەگەرلەرى مەن جۇلدەلى ورىن العاندار اقشالاي سىيلىقتارمەن جانە «شابىت» فەستيۆالىنىڭ ديپلومدارىمەن ماراپاتتالادى. ونىڭ ىشىندە، گران- پري - 350 مىڭ تەڭگە، ءبىرىنشى ورىن- 300 مىڭ تەڭگە، ەكىنشى ورىن - 250 مىڭ تەڭگە جانە ءۇشىنشى ورىنعا - 200 مىڭ تەڭگە بەرىلەدى.
تاعى ءبىر ايتا كەتەرلىگى، «جۋرناليستيكا» نوميناتسياسىندا قازاق جازۋشىسى، جۋرناليست شەرحان مۇرتازانىڭ قۇرمەتىنە ارنايى سىيلىق تابىستالادى.