گولوۆكيننىڭ جەكە ءومىرى مەن رينگكە ورالۋ ۋاقىتى جايلى جاڭا دەرەكتەر شىقتى

استانا. قازاقپارات - گەننادي گولوۆكيننىڭ پروموۋتەرى توم لەففلەر بوكسشىنىڭ جەكە ءومىرى مەن كەلەسى جەكپە-جەگىنە قاتىستى تىڭ اقپاراتپەن ءبولىستى دەپ جازادى  sports.kz سايتى.

«ءبىز گولوۆكين ءۇشىن ەڭ ۇزدىك قارسىلاستاردى قاراستىرىپ جاتىرمىز. ول قازاقستاننان ەندى عانا قايتىپ كەلدى. GGG وتانىندا ءوز وتباسىمەن ۋاقىت وتكىزىپ، دەمالىپ قايتتى.

قايتالاپ ايتۋدان شارشامايمىن، ول - ۇلتتىق چەمپيون. گولوۆكيننىڭ بارشا وتانداستارى ونىڭ چەمپيون بولارىنا كامىل سەنىمدى. GGG تانىمالدىلىعى قازىرگى تاڭدا شارىقتاپ كەتتى. جانكۇيەرلەر ونىڭ رينگكە ورالۋىن اسىعا كۇتۋدە»، - دەدى توم لەففلەر.

ايتا كەتەيىك، ءوزىنىڭ سوڭعى جەكپە-جەگىن گولوۆكين ساۋل الۆارەسكە قارسى وتكىزگەن بولاتىن. وتانداسىمىز تورەشىلەر شەشىمىمەن مەكسيكالىق قارسىلاسىنان مانسابىندا العاش رەت جەڭىلىس تاپقان ەدى.

GGG پروموۋتەرى بوكسشىنىڭ بريتانيالىق كاللۋم سميتپەن جۇدىرىقتاسۋى ابدەن مۇمكىن ەكەنىن ايتقان ەدى. گەنناديدىڭ رينگكە ورالۋى كەلەر جىلدىڭ كوكتەمىنە جوسپارلانىپ وتىر.