قازاقستاندا كەدەيلىك دەڭگەيى تومەندەدى - ەڭبەك ءمينيسترى

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا كەدەيلىك دەڭگەيىن تومەندەتۋگە قاتىستى مالىمەتتەردى جاريالادى، دەپ حابارلايدى قازاقپارات.

«الەۋمەتتىك كەپىلدىكتەردى ارتتىرۋ بويىنشا مەملەكەت جۇرگىزىپ وتىرعان الەۋمەتتىك ساياساتتىڭ ناتيجەسىندە ءومىر ءسۇرۋ دەڭگەيىنىڭ نەگىزگى كورسەتكىشتەرى جاقساردى. قازاقستاندا كەدەيلىك دەڭگەيى 1996-جىلعى 34,6 پايىزدان 2018-جىلعى 2-توقسان قورىتىندىسى بويىنشا 4,7 پايىزعا قىسقاردى. حالىقتىڭ جان باسىنا شاققانداعى نومينالدى اقشالاي تابىسى 2001-جىلدان باستاپ 2017-جىل ارالىعىندا 10,8 ەسەگە ءوسىپ، 83 مىڭ 53 تەڭگەنى قۇرادى»، - دەدى مينيستر پارلامەنت ماجىلىسىندەگى ۇكىمەت ساعاتىندا.

ونىڭ سوزىنە قاراعاندا، حالىقتىڭ تابىستار بويىنشا تەڭسىزدىگى قىسقارىپ كەلەدى. دجيني يندەكسىنىڭ ءمانى 2001-جىلدان 2017-جىل ارالىعىندا 0,287 دەيىن 1,3 ەسەگە قىسقاردى.

«كەدەيلىك تەرەڭدىگى 2001-جىلدان 2017-جىلعا دەيىن 37 ەسەگە، ياعني تيىسىنشە 14,8 پايىزدان 0,4 دەيىن، كەدەيلىك وتكىرلىگى - 65 ەسەگە، 6,5 پايىزدان 0,1 پايىزعا دەيىن ازايدى»، - دەدى ءمادينا ءابىلقاسىموۆا.

بۇدان بۇرىن حابارلانعانداي، ماجىلىستەگى ۇكىمەت ساعاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى اتاۋلى الەۋمەتتىك كومەكتىڭ جاڭا فورماتىن جەتىلدىرۋ بويىنشا ۇسىنىستار پىسىقتالىپ جاتقانىن ءمالىم ەتتى.