الماتىداعى «مەدەۋ» مۇز ايدىنىندا كونكي تەبۋدى تەگىن ۇيرەنۋگە بولادى

الماتى. قازاقپارات - «مەدەۋ» مۇز ايدىنىندا «سپورتتىق الماتى» باعدارلاماسى اياسىندا قالا تۇرعىندارى مەن قوناقتارىنا تەگىن كونكي تەبۋدى ۇيرەنۋ ساباقتارى جالعاسۋدا، دەپ اقپاراتتىق جانە سپورتتىق حاب حابارلايدى.

اڭىزعا اينالعان «مەدەۋ» قوناقتارى تەك كونكي تەۋىپ قانا قويماي، شارا ۇيىمداستىرۋشىلارىمەن بىرگە كوتەرىڭكى كوڭىل- كۇيدە بولدى. ساحنادا كەز كەلگەن كەلۋشى ولەڭدەر وقىپ، وزدەرىنىڭ بيلەرىن كورسەتتى.

ولاردىڭ اراسىنداعى ۇزدىك ءان كورەرمەندەردىڭ كومەگىمەن انىقتالدى. جەڭىمپازدار ءارتۇرلى باعالى سىيلىقتار مەن كونكيلەرمەن ماراپاتتالدى.

وسى سەنبى «مەدەۋگە» ءداستۇر بويىنشا كوپ ادام جينالدى. 20 عا جۋىق ارنايى كوك كيىم كيگەن نۇسقاۋشىلار بارلىقتارىنا ءوز بىلگەندەرىن ۇيرەتىپ، كوپتەگەن كەڭەستەر ايتتى.

«مەن كونكيمەن سىرعاناپ جۇرگەنىمە 5 جىل بولدى. نۇسقاۋشى بولامىن دەپ، ءوزىمنىڭ شەبەرلىگىمدى ارتتىردىم. ماعان ادامدارعا ساباق بەرگەن ۇنايدى. ولارعا كەڭەسىمدى بەرىپ تۇرامىن. ەڭ باستىسى ول ارينە قىزىعۋشىلىق پەن ىنتا. سونىمەن قاتار، كوبىسى كونكي تاڭداۋدان قاتەلەسىپ جاتادى، جانە وزدەرىنىڭ تەپە- تەڭدىكتەرىن ساقتاي المايدى. ونىڭ ءبارى تۇزەلەدى، تەك تالاپتانىپ، قورىقپاۋ كەرەك»، - دەپ نۇسقاۋشىلاردىڭ ءبىرى دميتريي پودپورين ءوز كەڭەسىمەن ءبولىستى.

ايتا كەتەر جايت، باعدارلاما ساعات 19:00-دەن 21:00-گە دەيىن ءار اپتانىڭ سەنبى كۇندەرى وسى مۇز ايدىنىندا وتكىزىلەدى. مۇز ايدىنىنا كىرۋ اقىلى. كىرۋ بيلەتى مەن كونكيدى جالعا الۋ باعالارى «مەدەۋ» مۇز ايدىنىنىڭ باعا كورسەتكىشى بويىنشا جۇرگىزىلەدى.

بۇل تەگىن كونكي تەبۋگە ۇيرەتۋ باعدارلاماسى وسى جىلدىڭ سوڭىنا دەيىن جالعاسادى. ونىڭ ماقساتى قالا تۇرعىندارىن سالاۋاتتى ءومىر سالتىنا بەيىمدەۋ بولىپ تابىلادى.