وسكەمەنگە قارىزى بار ادامدار مەن قىلمىسكەرلەردى انىقتايتىن باعدارشام ورناتىلدى

استانا. قازاقپارات - جاياۋ جۇرگىنشىلەرگە ارنالعان اقىلدى باعدارشامدار قارىزى بار ادامداردى، قۇقىق بۇزۋشىلار مەن ىزدەۋدەگى قىلمىسكەرلەردى انىقتايدى، دەپ حابارلايدى «التاي نيۋس».

وسكەمەن كوشەلەرىنە ىشكى ىستەر مينيسترلىگىنىڭ بازاسىنا قوسىلعان، جاياۋ جۇرگىنشىلەرگە ارنالعان، كامەراسى بار باعدارشام ورناتىلدى. پوليتسيا باسقارماسى وكىلدەرى اقىلدى باعدارشامنىڭ ازىرگە سىناق رەجيمىندە جۇمىس ىستەيتىنىن مالىمدەدى. ءبىراق قۇقىق قورعاۋ ورگاندارى قىزمەتكەرلەرى «عاجايىپ تەحنيكاعا» ۇلكەن ءۇمىت ارتىپ وتىر.

«ادام جولدان ءوتىپ بارا جاتقاندا، كامەرالار ونلاين رەجيمدە ءى ءى م- ءنىڭ بازاسىمەن سالىستىرىپ، ونىڭ كىم ەكەنىن انقتايدى. بازادا اليمەنت تولەمەيتىندەردەن باستاپ، ىزدەۋدەگىلەرگە دەيىن بارلىق قىلمىسكەرلەردىڭ ءتىزىمى بولادى»، - دەپ ءتۇسىندىردى وسكەمەن قالالىق پوليتسيا باسقارماسىنىڭ جول- تەحنيكالىق ينسپەكسيا ءبولىمىنىڭ باسشىسى سەرگەي كوۆالەنكو.

باعدارشام ارنايى ورتالىق الاڭعا ورناتىلعان، سەبەبى ول جاقتان ادامدار جولدان كوپ وتەدى. سونىمەن قاتار، جاقىن ماڭدا پوليتسيا ستاتسيونار پۋنكتى بار. ال اقىلدى تەحنيكا قىلمىسكەردى انىقتاسا، بۇل تۋرالى بەلگى دەرەۋ پاترۋل قىزمەتكەرلەرىنە تۇسەدى.

«ازىرگە باعدارشام قۇقىق بۇزۋشىلاردى انىقتاپ ۇلگەرمەدى، ءبىراق بۇل ۋاقىت ماسەلەسى. ءبىزدىڭ ءوڭىر ءۇشىن بۇل نوۋحاۋ. سەبەبى وبلىس كولەمىندەگى وزگە قالالاردا بۇعان دەيىن وسىنداي باعدارشام ورناتىلدى دەگەندى ەستىمەدىم»، - دەيدى كوۆالەنكو.

اقىلدى باعدارشام كامەرامەن عانا جابدىقتالماعان. سونىمەن قاتار ونىڭ قاس قارايعاندا اۆتوماتتى تۇردە قوسىلاتىن ءۇش جارىق كوزى بار. سوندىقتان ول جاياۋ جۇرگىنشىلەردى تاۋلىكتىڭ قاي مەزگىلى بولماسىن، جازباي تاني الادى. ياعني، 24 ساعات ۇزدىكسىز جۇمىس ىستەيدى.