قىزىلوردالىق ونەرتاپقىش امبەباپ قولاربا جاساپ شىعاردى

قارماقشى. قازاقپارات -  قىزىلوردا وبلىسى قارماقشى اۋدانىنىڭ ورتالىعى - جوسالى كەنتىنىڭ تۇرعىنى نۇرتاي جايىقبايەۆ ءۇي شارۋاشىلىعىنا ارنالعان امبەباپ قولاربا جاساپ شىعاردى، دەپ حابارلايدى قازاقپارات ءتىلشىسى.

ونەرتاپقىش بۇل جوباسىنىڭ كوپشىلىككە ۇلكەن پايداسى تيەتىنىن ايتادى. ونىڭ ايتۋىنشا، مۇنداي قولاربا بۇرىن ەشبىر جەردە جاسالماعان. امبەباپ قولاربا جەرگىلىكتى تۇرعىنداردىڭ ءۇي شارۋاشىلىعىنداعى جۇمىستارىن كوپ جەڭىلدەتەتىن بولادى. تۇرعىندار اتالمىش قۇرىلعىنى پايدالانۋ ارقىلى كوپتەگەن ىستەرىن اتقارىپ شىعۋىنا ابدەن بولادى. قولاربا بىرنەشە جۇمىستى اتقارىپ شىعا الادى.

«نازار اۋدارساڭىز، قولارباعا كوپتەگەن قوسالقى بولشەكتەر بەكىتىلگەن. سول بولشەكتەر كوپتەگەن جۇمىستاردى اتقارۋعا نەگىز بولا الادى. ونى قىسى- جازى كادەگە جاراتۋعا ابدەن بولادى. قىس ايلارىندا اتالمىش قولاربامەن قار كۇرەي الاسىڭ. ال اربا ءۇستىن ورناتىلعان اۋىسپالى جۇكسالعىش قىزمەتىمەن تاعى دا كوپتەگەن فۋنكسيانى پايدالانۋعا نەگىز بار. سونداي- اق، مەن اربانىڭ استىنا كۋلتيۆاتور بەكىتتىم. ونى كوكتەمگى دالا جۇمىستارىندا پايدالانامىز. ول جەردى قوپسىتادى، ءارامشوپتى وتايدى. قولاربادا سوقا دا ورناتىلعان. ونى جەر جىرتۋ بارىسىندا ىسكە اسىرامىز. ايتا كەتەرلىگى، قولاربادا ەشقانداي ەلەكتر قۋاتى پايدالانا قويمايدى»، - دەدى نۇرتاي جايىقبايەۆ.

ونەرتاپقىش قارماقشى اۋداندىق اگرارلى- تەحنيكالىق كوللەدجىندە قىزمەت اتقارادى. ارناۋلى وقۋ ورنىندا «اۆتوموبيل، تراكتور قۇرىلىسى جانە وعان تەحنيكالىق قىزمەت كورسەتۋ» پانىنەن ءدارىس بەرەدى. بىلىكتى ۇستاز ءوز شاكىرتتەرىن ونەرتاپقىشتىق قاسيەتتەرگە باۋلىپ كەلەدى. ارناۋلى وقۋ ورنىندا ن. جايىقبايەۆ 2011 -جىلدان بەرى قىزمەت جاسايدى. ول شىعارماشىل پەداگوگتاردىڭ كورمەسى مەن باسقا دا شارالارىنا تۇراقتى تۇردە قاتىسىپ كەلەدى. ولاردىڭ بارلىعىندا جۇلدەلى ورىنداردان كورىنىپ، سان الۋان ماراپاتتارعا قول جەتكىزدى. ول جاساعان قولاربا قارماقشى اۋدانىنىڭ 90 -جىلدىق مەرەيتويىنا وراي وتكەن ينجەنەر- پەداگوگتاردىڭ «باعدارلى بايقاۋ- كورمەسى» سايىسىندا جوعارى باعالاندى. ەندى ول وبلىستىق بايقاۋعا قاتىساتىن بولادى.

اۆتور: ءادىلجان ۇمبەت