جانىبەك ءالىمحان ۇلىنىڭ جەكپە- جەگى تىكەلەي ەفيردە كورسەتىلەدى

استانا. قازاقپارات - «قازاقستان» تەلەراديوكورپوراتسياسى وتاندىق كاسىپقوي بوكسشىلارىمىزدىڭ جەكپە- جەكتەرىن «قازاقستان» جانە «قازسپورت» تەلەارنالارىندا كورسەتۋ قۇقىعىنا يە بولدى، دەپ حابارلايدى قازاقپارات.

 «4 - قاراشا كۇنى ا ق ش- تىڭ تەحاس شتاتىنداعى ەل- پاسوداعى Don Haskins Convention Center كەشەنىندە قازاق بوكسشىلارى جانىبەك ءالىمحان ۇلى مەن ساعادات راحمانقۇل بوكس كەشىنىڭ اندەكارتىندا شارشى الاڭعا شىعادى. باستى جەكپە- جەك مەكسيكالىق ميگەل بەرچەلت (34-1, 30 ك و) پەن ميگەل رومان (60-12، 47 ك و) اراسىندا وتەدى» دەلىنگەن كورپوراتسيا تاراتقان حابارلامادا.

 بۇل - جانىبەك ءالىمحان ۇلىنىڭ (3-0, 1 ك و) كاسىپقوي بوكستاعى ءتورتىنشى جەكپە- جەگى. ونىڭ قارسىلاسى - 32 جاستاعى امەريكالىق بىلعارى قولعاپ شەبەرى ۆون الەكساندر (12-1, 8 ك و). ال، ساعادات راحمانقۇل (3-0, 1 ك و) پۋەرتو- ريكالىق نيكلاۋس فلازبەن (5-1, 4 ك و) قولعاپ تۇيىستىرەدى.

ايتا كەتەيىك، جانىبەك ءالىمحان ۇلىنىڭ اۋەسقوي بوكستا قول جەتكىزگەن جەتىستىكتەرى ءبىر توبە. ول - الەم جانە ازيا چەمپيونى، ازيا ويىندارىنىڭ جەڭىمپازى، قازاقستاننىڭ بىرنەشە دۇركىن چەمپيونى. 2018 -جىلى جانىبەك كاسىپقوي بوكسقا اۋىسىپ، 3 جەكپە- جەك وتكىزىپ ۇلگەردى. بارلىعىندا جەڭىسكە جەتىپ، بىرەۋىن نوكاۋتپەن اياقتادى. ال، قارسىلاسى ۆون الەكساندر كاسىپقوي بوكستا 13 جەكپە- جەك وتكىزىپ، 12-سىندە جەڭىسكە جەتكەن. 8 كەزدەسۋىن نوكاۋتپەن اياقتاعان. ساعادات راحمانقۇل اۋەسقوي بوكستا 69 كەلىگە دەيىنگى سالماقتا 2013 -جىلى ەل بىرىنشىلىگىندە توپ جارىپ، ال 2014 -جىلى كۇمىس جۇلدەگەر اتانعان بولاتىن.

 وتانداستارىمىزدىڭ جەكپە- جەكتەرىن «قازاقستان» مەن «قازسپورت» تەلەارنالارى 4 - قاراشا كۇنى، ساعات 04:00-دە تىكەلەي ەفيردە كورسەتەدى.