الماتىدا جالعان قۇجاتپەن شەكارادان وتپەك بولعان ازاماتتار ۇستالدى

الماتى. قازاقپارات - 3 - قاراشا كۇنى تاڭعى ساعات 05:00-تە «الماتى» حالىقارالىق اۋەجايىنىڭ كەلۋشىلەر زالىندا «دۋباي- الماتى» رەيسىن راسىمدەۋ كەزىندە تۇركيا رەسپۋبليكاسىنىڭ ءۇش ازاماتى قولعا ءتۇستى،

 دەپ حابارلايدى قازاقپارات شەكارا قىزمەتىنە سىلتەمە جاساپ.

ولار ۇسىنعان يزرايل ازاماتىنىڭ قۇجاتتارى شەكاراشىلاردىڭ كۇدىگىن تۋعىزعان. اتالعان تۇلعالار جالعان قۇجات ارقىلى قازاقستاننىڭ مەملەكەتتىك شەكاراسىن زاڭسىز كەسىپ وتپەك بولعان. «قۇجاتتاردى تەرەڭ زەردەلەۋ بارىسىندا مەملەكەتتىك شەكارانى كەسىپ ءوتۋ قۇقىعىن بەرەتىن ءتولقۇجاتتاردىڭ تولىعىمەن قولدان جاسالعانى انىقتالدى. تۇركيا ازاماتتارى شەكارادان وتكىزىلگەن جوق. قازىرگى ۋاقىتتا اتالعان فاكتى بويىنشا تەرگەۋ جۇمىستارى ءجۇرىپ جاتىر» دەلىنگەن شەكارا قىزمەتى تاراتقان حابارلامادا.