پەداگوگتارعا جاۋاپتارى بار كىتاپشالار ساتىلۋدا

استانا. قازاقپارات - ق ر ءبىلىم جانە عىلىم مينيسترلىگىنىڭ ۇلتتىق تەستىلەۋ ورتالىعى پەداگوگتارعا بىلىكتىلىك تەستىنىڭ جاۋاپتارى كورسەتىلگەن كىتاپشالاردى ساتىپ الماۋعا كەڭەس بەردى، دەپ حابارلايدى قازاقپارات ءتىلشىسى.

«قاراشا ايىندا پەداگوگ قىزمەتكەرلەردى ۇلتتىق بىلىكتىلىك تەستىلەۋدەن وتكىزۋگە بايلانىستى، كەيبىر ايماقتاردا بەيتانىس ادامداردىڭ ماماندىقتار بويىنشا جاۋاپتارى كورسەتىلگەن تەست كىتاپشالارىن ساتۋ جاعدايى جيىلەپ كەتتى. ولار ق ر ب ع م ۇلتتىق تەستىلەۋ ورتالىعىنىڭ رەسمي تەست تاپسىرمالار بازاسىنا سىلتەمە جاساعان كورىنەدى. اتالعان تەست كىتاپشالارىنىڭ مازمۇنىنا جانە ساتىلۋ فاكتىسىنە ق ر ب ع م ۇلتتىق تەستىلەۋ ورتالىعىنىڭ ەش قاتىسى جوق»، - دەپ مالىمدەدى ورتالىقتان.

جۇرگىزىلگەن ءبىرقاتار تەكسەرىس ناتيجەلەرى تەست كىتاپشالارى ق ر ب ع م ۇ ت و-نىڭ رەسمي سايتىندا (www.testcenter.kz) جاريالانعان سىناق تۇرىندەگى تەگىن تەستىلەردەن جانە بەيرەسمي ينتەرنەت كوزدەردەن الىنعان ماتەريالداردان قۇرالعانىن انىقتاعان.

«قولدانىستاعى زاڭناماعا سايكەس، ق ر ب ع م ۇلتتىق تەستىلەۋ ورتالىعى تەستىلەۋدىڭ ءار كەزەڭىندە تەك جاڭارتىلعان تەست تاپسىرمالارىن قولدانادى. سوندىقتان، بارلىق مۇددەلى تۇلعالارعا رەسمي سايتتاعى اقپاراتاردى پايدالانىپ، الاياقتىق ارەكەتتىڭ قۇربانى بولماۋعا شاقىرامىز»، - دەپ اتاپ ءوتتى ۇلتتىق تەستىلەۋ ورتالىعىنان.