ادام عارىشتان جەرگە قۇلاعان كەزدە نە بولادى؟

 استانا. قازاقپارات - عالىمدار ادام عارىشتان قۇلاعان كەزدە نە بولاتىنىن ءتۇسىندىرىپ بەردى.

2014-جىلدىڭ 24- قازانىندا Google كومپانياسىنىڭ جوعارى لاۋازىمدى قىزمەتكەرى روبەرت الان يۋستاس ستراتوسفەرادان پاراشيۋتپەن سەكىرىپ، الەمدە بۇرىن-سوڭدى بولماعان رەكورد ورناتتى. بۇل كەزدە بيىكتىك 42 كيلومەتردى قۇرادى. ال الان اسپاننان جەرگە قاراي 1320 كيلومەتر ساعاتىنا جىلدامدىقپەن قوزعالعان، دەپ حابارلايدى naked-science.ru باسىلىمىنا سىلتەمە جاساپ Stan.kz.

ال ادام عارىشتان سەكىرسە نە بولماق؟ جەر مەن عارىشتىڭ اراسىنداعى قاشىقتىقتىڭ بۇدان دا الىس ەكەنى بەلگىلى. حالىقارالىق اۆياتسيا قاۋىمداستىعىنىڭ ماماندارى عارىش پەن اتموسفەرا اراسىنداعى قاشىقتىق 100 كيلومەتردى قۇرايتىنىن ايتتى.

دەسە دە، بۇلاي ەشكىم سەكىرىپ كورمەگەنىن بىردەن ايتۋىمىز كەرەك. ال جۇزەگە اسىرۋ ءۇشىن بۇرىن-سوڭدى بولماعان دۇنيەنى جاساۋ كەرەك بولادى. ءبىراق، جاساعان جاعدايدا ءتىرى قالمايتىنى انىق. سەبەبى ادام مەزوسفەرا قاباتىنان ءوتىپ بارا جاتقان كەزدە بالقىپ كەتۋى عاجاپ ەمەس.