قاسىم- جومارت توقايەۆ بەلارۋس پرەزيدەنتىنىڭ قابىلداۋىندا بولدى

استانا. قازاقپارات - سەناتىنىڭ ءتوراعاسى قاسىم- جومارت توقايەۆ سول ەلدىڭ پرەزيدەنتى الەكساندر لۋكاشەنكونىڭ قابىلداۋىندا بولدى. بۇل تۋرالى قازاقپارات سەناتتىڭ باسپا ءسوز قىزمەتىنە سىلتەمە جاساپ حابارلايدى.

 سەنات ءتوراعاسى بەلارۋس باسشىسىنا پرەزيدەنت نۇرسۇلتان نازاربايەۆتىڭ سالەمى مەن ەڭ ىزگى تىلەكتەستىگىن جەتكىزدى. ق. توقايەۆ ەكى ەلدىڭ مەملەكەت باسشىلارىنىڭ سەنىمدى قاتىناستارىنىڭ ارقاسىندا قازاقستان مەن بەلارۋستىڭ ءوزارا قارىم- قاتىناستارى ستراتەگيالىق دەڭگەيگە كوتەرىلگەنىن اتاپ ءوتتى.

پارلامەنتتىڭ جوعارعى پالاتاسىنىڭ باسشىسى الەمدىك ساياساتتا بولىپ جاتقان ۇردىستەرگە ەكى ەل كوزقاراستارىنىڭ جاقىن ەكەنىنە توقتالدى. ق. توقايەۆتىڭ ايتۋىنشا، بۇل بىزگە ب ۇ ۇ، ە ق ى ۇ جانە باسقا دا حالىقارالىق ۇيىمدار اياسىندا ناتيجەلى ىنتىماقتاسۋعا، ءتۇرلى حالىقارالىق الاڭداردا ءوزارا قولداۋ مەن كۇش- جىگەردى ۇيلەستىرۋگە مۇمكىندىك بەرەدى. بۇگىندە ىقپالداستىق بىرلەستىكتەرىنىڭ اياسىندا تىعىز ءارى تابىستى قارىم- قاتىناس قالىپتاسىپ وتىر.

سەنات ءتوراعاسى بۇگىنگى كۇنگى ەڭ وتكىر گەوساياسي تەكەتىرەستەردى رەتتەۋدەگى - ۋكراين جانە سيريالىق شيەلەنىستەردەگى مينسك مەن استانانىڭ مامىلەگەرلىك ماڭىزدى رولدەرىن اتاپ ءوتتى. ونىڭ پىكىرىنشە، بۇل ءبىزدىڭ ەلدەرىمىزدىڭ حالىقارالىق قاتىناستاردى تۇراقتى دامۋ ارناسىنا تۇسىرۋگە شىنايى مۇددەلى بولۋىنان تۋىنداپ وتىر.

جۇزدەسۋشىلەر ەۋروپاداعى قاۋىپسىزدىك جانە ىنتىماقتاستىق جونىندەگى ميۋنحەن كونفەرەنسياسى نەگىزگى توپتارىنىڭ مينسكىدە ءوتىپ جاتقان وتىرىسىنىڭ كۇن ءتارتىبى بويىنشا پىكىر الماستى. ق. توقايەۆ وندا بەلارۋس مەملەكەتى باسشىسىنىڭ ءسوزىن اتاپ ءوتتى، ونىڭ ايتۋىنشا، فورۋمنىڭ باسقا قاتىسۋشىلارى دا ونى باعالاپ وتىر.

«ىسكەرلىك تۇرعىسىنداعى اشىق اڭگىمە بولدى ءارى حالىقارالىق جانە ەۋروپالىق قوعامداستىقتىڭ اتىنا دا وتە سالماقتى يشاراتقا تولى دەۋگە بولادى»، - دەدى سەنات باسشىسى.

ق. توقايەۆتىڭ پىكىرىنشە، قاتىسۋشىلاردىڭ وكىلەتتى قۇرامى مەن شارادا تالقىلاناتىن ماسەلەلەردىڭ اۋقىمى بەلارۋستىڭ الەمدىك كۇردەلى ماسەلەلەردىڭ شەشىمىن ىزدەستىرۋ ءۇشىن مويىندالعان الاڭعا اينالىپ كەلە جاتقانىن كورسەتەدى.

1- قاراشادا ق. توقايەۆ ميۋنحەن كونفەرەنسياسى نەگىزگى توپتارىنىڭ مينسكىدە ءوتىپ جاتقان كەزدەسۋىنە قاتىستى. ايماقتىق قاۋىپسىزدىكتىڭ كەسكىن- كەلبەتى شاراعا قاتىسۋشىلاردىڭ داعدىلى نازارىندا بولدى. بەلارۋس استاناسىنداعى پىكىرسايىستا شىعىس- باتىس اراسىنداعى ءوزارا قارىم- قاتىناستار، ايماقتىق تەكەتىرەستەر، شىعىس ەۋروپاداعى ەكونوميكالىق جاعداي، سونداي- اق ەنەرگەتيكالىق جانە ترانسۇلتتىق قاۋىپسىزدىكتىڭ وزەكتى ماسەلەلەرى قامتىلدى. فورۋمدا مەملەكەتتەر مەن ۇكىمەتتەردىڭ باسشىلارى، پارلامەنتتەر ءتوراعالارى، حالىقارالىق ۇيىمداردىڭ جەتەكشىلەرى، ىقپالدى قوعام قايراتكەرلەرى مەن تالداۋ ورتالىقتارىنىڭ وكىلدەرى ءسوز الدى.

ق. توقايەۆ مينسك پروتسەستەرى مەن شىعىس پەن باتىستىڭ ءوزارا قارىم- قاتىناستارىنا ارنالعان تاقىرىپتىق سەسسيالارعا قاتىستى. قازاقستان دەلەگاتسياسىنىڭ باسشىسى كونفەرەنسيا اياسىندا ارمەنيا پرەزيدەنتى ارمەن ساركيسيانمەن كەزدەستى.

اڭگىمە بارىسىندا ەكىجاقتى كۇن تارتىبىندەگى ماسەلەلەر قارالدى. ق. توقايەۆ پەن ا. ساركيسيان ساياسي جانە ساۋدا- ەكونوميكالىق سالالارداعى ىنتىماقتاستىقتى كەڭەيتۋگە ىقىلاس ءبىلدىردى. قازاقستان سەناتىنىڭ ءتوراعاسى قاسىم- جومارت توقايەۆ پەن بەلارۋس ۇلتتىق جينالىسى رەسپۋبليكا كەڭەسىنىڭ ءتوراعاسى ميحايل مياسنيكوۆيچتىڭ يننوۆاتسيالىق سالاداعى ىنتىماقتاستىقتى دامىتۋ جونىندەگى كىشى كوميسسيا قۇرۋ تۋرالى حاتتاماعا قول قويۋى پارلامەنتتىك قۇرام ساپارىنىڭ قورىتىندىسى بولدى. ەكى مەملەكەت پارلامەنتتەرى جوعارعى پالاتالار ءتوراعالارىنىڭ الدىنداعى كەلىسسوزىندە وسى ماسەلە بويىنشا ۋاعدالاستىققا قول جەتكەن بولاتىن. بۇل ارناداعى ءوزارا ءىس- قيمىل پارلامەنتارالىق ءۇنقاتىسۋدا جاڭا مۇمكىندىكتەردى اشادى جانە بىرلەسكەن جوبالاردى ىسكە اسىرۋ مەن قازىرگى زامانعى تەحنولوگيالاردى ىلگەرىلەتۋدى زاڭنامالىق تۇرعىدا قامتاماسىز ەتۋگە بايلانىستى وڭ ناتيجە بەرەتىن بولادى.

قول قويۋ سالتاناتىنىڭ سوڭىندا ق. توقايەۆ «ءبىز ۇكىمەتتەردى دە، ۇكىمەتتىك ەمەستەرمەن قوسا باسقا دا ۇيىمداردى ءدال وسى سالادا ءوزارا تىعىز ءىس- قيمىل جاساۋعا ىنتالاندىرۋدى ءوز مىندەتىمىز رەتىندە كورىپ وتىرمىز. بەلارۋس ەكونوميكاسى ورنىقتى قارقىنمەن دامىپ كەلەدى جانە قازاقستان ءبىر جاعىنان بەلارۋس تاجىريبەسىن زەردەلەۋگە، ال ەكىنشى جاعىنان وسى سالادا ءوزارا ءىس- قيمىلعا مۇددەلى بولىپ وتىر»، - دەدى.