الماتى زەينەتكەرلەرى جاتتىعۋ زالى مەن باسسەيندەرگە تەگىن قاتىسىپ ءجۇر
بۇل تەگىن باعدارلاما 63 جاستان اسقان زەينەتكەرلەردىڭ اراسىندا سالاۋاتتى ءومىر سالتىن ۇستانۋعا باعىتتالعان. قازىر وعان 800 ادام تىركەلىپ، كۇندەلىكتى جاتتىعۋ وتكىزۋدە. ولاردىڭ تەڭ جارتىسى باسسەينگە، ال 400 ادام فيتنەس- زالدارعا جازىلعان.
جوبا شىلدە ايىنىڭ ورتاسىندا باستالعان بولاتىن. جاتتىعۋلار قالانىڭ «اكۆاستارس»، «قازاقستان» ساۋىقتىرۋ سپورت كەشەنى، «Н2О» سىندى بەس باسسەينى بار ورتالىقتارىندا جانە «پيراميدا»، «اكۆاستارس» سەكىلدى بەس فيتنەس- زالىندا وتكىزىلىپ جاتىر.
- باعدارلاما قاتىسۋشىلارىنىڭ ءارقايسىسى اپتاسىنا ءۇش رەت ءبىر ساعاتتان جاتتىعۋ وتكىزۋى قاجەت. ول ادامدى ساۋىقتىرۋ ءۇشىن جاقسى اسەر بەرەدى. تاجىريبەگە سۇيەنسەك، وسى جاستاعى ادامدار دەنە شىنىقتىرۋمەن اينالىسسا اعزاسىنىڭ جۇمىس ىستەۋى مەن قان اينالىمى جاقسارىپ، قانتتارى ازايادى. سونداي- اق، حولەستەريندەرى ازايىپ، بۋىن ەتتەرى اۋىرمايتىن بولادى جانە وستەوحوندروزدارى كەتەدى، - دەيدى وسى الەۋمەتتىك جوبانىڭ جەتەكشىسى ەرلان ادامبەكوۆ.
ونىڭ ايتۋىنشا ءار جاتتىعۋ توپتارىندا ءبىر كەزەكشى باپكەر بولادى. ولار كومەك قاجەت بولسا، زەينەتكەرلەرگە جاتتىعۋدى قالاي دۇرىس جاساپ، نە ىستەۋگە بولادى جانە نە ىستەۋگە بولمايتىندىعىن ايتىپ بەرەدى.
الايدا، ءار ادامعا جەكە باپكەر بولماسا جۇمىس جاساۋ قيىنداۋ ەكەن. سەبەبى، قارت ادامدارعا ەرەكشە جانە جەكە تاسىلدەر كەرەك. ەگەر كەلەسى جىلى وسى باعدارلاما جالعاسىن تاباتىن بولسا، بۇل باعىتتا جۇمىس اتقارىلۋى مۇمكىن. ال، بيىل بۇل جوبا تەك پيلوتتىق رەجيمدە جۇزەگە اسىرىلىپ، جىلدىڭ سوڭىنا دەيىن جالعاسادى.
ايتا كەتەر جايت، زەينەتكەرلەردىڭ اراسىندا جاسى 80-نەن اسقان قارتتار دا بەلسەندى ءومىر سالتىن جۇرگىزىپ، ءوز قاتارلارىنان قالىسپاي كەلەدى. وسى جوبانىڭ قاتىسۋشىسى بولام دەگەن كەز كەلگەن زەينەتكەر قاجەتتى قۇجاتتار، ياعني زەينەتكەر كۋالىگى، ءتولقۇجاتىن وتكىزىپ، كەلەسى نومىرلەر بويىنشا ۇيىمداستىرۋشىلارعا حابارلاسۋى ءتيىس: 87017610763 جانە 87272952550 .
