دەۆيس كۋبوگى: قازاقستاندىقتاردىڭ العاشقى قارسىلاسى كىمدەر؟

استانا. قازاقپارات - تەننيستەن قازاقستان قۇراماسىنىڭ دەۆيس كۋبوگىندەگى قارسىلاسى انىقتالدى، دەپ حابارلايدى قازاقپارات ءتىلشىسى.

ق ر ۇلتتىق وليمپيادالىق كوميتەتىنىڭ باسپا ءسوز قىزمەتىنىڭ حابارلاۋىنشا، لوندوندا وتكەن جەرەبە ناتيجەسى بويىنشا، 2019-جىلعى دەۆيس كۋبوگىنىڭ ءبىرىنشى كەزدەسۋىندە قازاقستان پورتۋگالياعا قارسى وينايدى.

بەس ماتچقا سوزىلاتىن كەزدەسۋ 1-2- اقپان كۇندەرى استانادا وتەدى.

ەسكە سالا كەتەيىك، بيىلعى دەۆيس كۋبوگىندە قازاقستان شۆەيتساريا قۇراماسىن 4:1 ەسەبىمەن ۇتىپ، سىرت الاڭدا حورۆاتياعا 1:3 ەسەبىمەن جول بەردى.

دەۆيس كۋبوگى - 1900-جىلدان بەرى تەننيستەن ەرلەر اراسىندا وتكىزىلەتىن ءىرى حالىقارالىق تۋرنير. 1979-جىلدان بەرى حالىقارالىق تەننيس فەدەراتسياسىنىڭ قولداۋىمەن وتكىزىلەدى.

اۆتور: كۇنسۇلتان وتارباي