اۋىر اتلەتتەرىمىز قىزۋ تارتىستى ساعىنىپ قالدى - باس باپكەر الەم چەمپيوناتى جايلى
«بۇگىن الەم چەمپيوناتىنىڭ فينالدىق وتىنىمدەرى كەلىپ ءتۇستى. ەندى وسىعان قاراپ، اتالمىش ستارتتاعى باسەكە شامامەن قالاي ءوربيتىنىن سەزىپ وتىرمىز. البەتتە، وڭايعا تۇسپەسى انىق! A جانە B توپتارىنداعى بارلىق قارسىلاستار - تاجىريبەسى ۇشقىر ساقا سپورتشىلار»، - دەيدى يۋري مەلنيكوۆ.
باس باپكەردىڭ ايتۋىنشا، قازاقستاندىق اۋىر اتلەتتەر ءبىر جىل بويى جارىستاردان شەتتەتىلىپ، كەتكەن ەسەسىن وسى جولى قايتارۋعا بارىن سالادى.
«كوماندانىڭ الدىنا قويىپ وتىرعان باستى مىندەتى - بارىنشا لايىقتى ونەر كورسەتۋ. شەتتەتىلگەن ءبىر جىلدىڭ تەككە وتپەگەنىن دالەلدەۋىمىز كەرەك. ءبىز وسى جارىسقا تىنىمسىز دايىندالدىق. مىنە، سوندىقتان لايىقتى ناتيجەگە قول جەتكىزەمىز دەگەن سەنىمدەمىن. مەدال سانى جاعىنان ازىرگە ەشتەڭە ايتقىم كەلمەيدى. ءبارىن پوموست كورسەتەدى. اۋىر اتلەتتەرىمىزدىڭ دايىندىعى جاقسى. سپورتشىلارىمىز قىزۋ ايقاستى ساعىنىپ قالدى. البەتتە، سول باسەكەلى تارتىسقا وسى الەم چەمپيوناتىندا كۋا بولارىمىز انىق»، - دەيدى يۋري مەلنيكوۆ.
ەسكە سالا كەتسەك، بۇعان دەيىن اشحابادتا 2018-جىلى اۋىر اتلەتيكادان وتەتىن الەم چەمپيوناتىنا قاتىساتىن ق ر قۇراماسىنىڭ قۇرامى بەلگىلى بولعانىن حابارلاعان بولاتىنبىز. 1-10 قاراشا ارالىعىندا وتەتىن الەم چەمپيوناتى 2020-جىلعى وليمپيادا ويىندارىنىڭ ەڭ العاشقى ليتسەنزيالىق ستارتى بولىپ تابىلادى. اتالمىش جارىستا قازاقستاننىڭ نامىسىن 20 اۋىر اتلەت قورعايدى.