ماڭعىستاۋلىق مەتسەناتتار ميلليوندارىن قالاي جۇمسايدى
ءوڭىردىڭ دامۋىنا سۇبەلى ۇلەس قوسىپ جۇرگەن ءبىرقاتار كاسىپكەرلەر مەن ەرىكتى ازاماتتارعا «جومارت جۇرەك» سىيلىعى تابىستالدى.
اكىمدىك تاراتقان حابارلاماعا قاراعاندا، «اتامەكەن» باعدارلاماسى بويىنشا اعىمداعى جىلى وبلىستا 39 جوبا مەتسەناتتاردىڭ كومەگىمەن ىسكە اسىرىلعان. اتاپ ايتساق، ايماق بويىنشا 12 سپورت كەشەندەرى مەن الاڭى، 4 مەكتەپ جانىنان جىلىجاي، 100 ورىندىق وتباسىلىق جاتاقحانا سالىنعان. سونداي- اق، كاسىپكەرلەردىڭ ارقاسىندا مۇمكىندىگى شەكتەۋلى ادامدارعا 11 پاتەر سىيعا بەرىلىپ، 18 تۇرعىن ءۇي جوندەلگەن جانە 4 بالالار ويىن الاڭى بوي كوتەرگەن. 2018 -جىلى تاعى جالپى سوماسى 14 ميلليارد 785 ميلليون 60 مىڭ تەڭگەگە ەسەپتەلگەن 40 جوبانى ىسكە اسىرۋ باستالدى. جىلدىڭ سوڭىنا دەيىن 22 جوبا اياقتالادى دەپ كۇتىلۋدە.
مەتسەناتتار مەن كاسىپكەرلەر باس قوسقان جيىندا وبلىس اكىمى ەرالى توعجانوۆ تاعى 29 جوبانىڭ ىسكە اساتىنىن ايتىپ ءوتتى.
«سىزدەردىڭ كومەك جانە قولداۋلارىڭىزدىڭ ارقاسىندا، ءبىز 2019-2020 -جىلدارى جالپى سوماسى 13,5 ميلليارد تەڭگە بولاتىن 29 جوبانى ىسكە اسىرۋدى جوسپارلاپ وتىرمىز. اقتاۋ قالاسىندا سپورت سارايىنىڭ قۇرىلىسى، جاڭاوزەندە 59 پاتەردى جوندەۋ، بەينەۋدە 160 ورىندىق سپورت كەشەن قۇرىلىسىن سالۋ، مۇنايلى اۋدانىندا كىتاپحانا مەن مادەنيەت ءۇيىنىڭ قۇرىلىسى جانە تاعى باسقا قۇرىلىستار سالۋ جوسپارلانۋدا» ، - دەدى ەرالى توعجانوۆ.
اتىمتاي جومارتتارعا «جىل مەتسەناتى» ، «تۋعان ولكە» ، «جىل تۇلعاسى» ، «ۇزدىك ۇيىم» ، «ەرەن ەرىكتىلىگى» اتالىمدارى بويىنشا سىيلىقتار تاپسىرىلدى.
سونىمەن، «جىل مەتسەناتى» نوميناتسياسى بويىنشا ەسەنگەلدين ساكەن ەسەنگەلدى ۇلى جانە كەرەلبايەۆ اسقاربەك سايىن ۇلى ماراپاتتالدى.
«تۋعان ولكە» سىيلىعى لەسبايەۆ مۇحات بەردىبەك ۇلى، تابىلدييەۆ دۇيسەباي امانحان ۇلى جانە مۇڭالبايەۆ سۇڭعات اڭشىباي ۇلىنا تابىستالدى. بەلسەندى ازاماتتىق ۇستانىمى، ءارتۇرلى باعىتتاعى كەڭ اۋقىمدى قايىرىمدىلىق قىزمەتتى جۇزەگە اسىرعانى ءۇشىن «جىل تۇلعاسى» نوميناتسياسىن شاكەنوۆا دامەتكەن اساباي قىزى، بيمىرزايەۆ يسا يبرايىم ۇلى جانە ورىسبايەۆ اببات جاڭگىرحان ۇلى يەلەندى.
الەۋمەتتىك ماڭىزى بار جوبالاردى، قايىرىمدىلىق جوبالاردى ىسكە اسىرۋدا باس دەمەۋشلىك جاساعانى ءۇشىن «ۇزدىك ۇيىم» نوميناتسياسىمەن قوجانەپەسوۆ باقىتجان ماتكەرەي ۇلى، جولدىبايەۆ اسىلبەك تۇرار ۇلى جانە ءابدىراحمان قۋانىشبەك سپان ۇلى ماراپاتتالدى.
ۆولونتەرلىك قىزمەتتەرگە بەلسەندى قاتىسقانى ءۇشىن «ەرەن ەرىكتىلىگى» نوميناتسياسىمەن وگاي انتونينا ۆياچەسلاۆوۆنا، مۋرادوۆا ءسانىم ءىزباسار قىزى جانە «ۇممەت جاستارى» قوعامدىق ۇيىمى ماراپاتتالدى. ال «جىل تۇلعاسى» اتاعى وڭىرگە تانىمال كاسىپكەرلەردىڭ ءبىرى ءبىرى - يسا بيمىرزايەۆقا بەرىلدى.
«جاڭبىر مول جاۋسا، كوك ءشوپ كوپ شىعادى دەگەندەي. ەگەر كوپ تابىس تاپسام، جان- جاعىمدارعا كومەك كورسەتۋگە تىرىسام. تاپقان تابىسىم تەك جاقسىلىققا بۇيىرسا ەكەن دەپ ويلايمىن» - دەيدى كاسىپكەر يسا بيمىرزايەۆ.