ازەربايجان قازاق استىعىن ساتىپ الا باستادى

استانا. قازاقپارات - ازەربايجان قازاق استىعىن ساتىپ الا باستادى.

بۇل تۋرالى بۇگىن قازاقستان مەن ازەربايجان اراسىنداعى ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ 15-وتىرىسى الدىندا ب ا ق وكىلدەرىنە سۇحبات بەرگەن ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات ءتىلشىسى.

«اعىمداعى جىلدىڭ 8-ايىندا قازاقستانمەن ازەربايجان اراسىنداعى تاۋار اينالىمى وتكەن جىلمەن سالىستىرعاندا 2,1 ەسە ءوستى. ياعني، شامامەن 168 ميلليون دوللاردى قۇرادى. 2017-جىلى تاۋار اينالىمىن تاياۋ 2-3 -جىلدىڭ ىشىندە ەسەلەي ءتۇسۋ تاپسىرماسى بەرىلگەن بولاتىن. دەگەنمەن، ەگەر وسى ءۇردىس ساقتالاتىن بولسا، وندا جىلدىڭ سوڭىنا دەيىن تاۋار اينالىمىن ەسەلەۋ مىندەتىن مەرزىمىنەن بۇرىن ورىندايتىن بولامىز. ازەربايجان تاراپىنىڭ قازاقستاندىق استىقتى ساتىپ الۋىن قايتا جولعا قويۋى دا ماڭىزدى. وزدەرىڭىز دە بىلەتىندەي، سوڭعى ۋاقىتتا قازاقستاندىق استىق ساتىپ الىنبادى دەسەك تە بولادى. بۇل دا تاۋار اينالىمىنىڭ وسىمىنە سەپتىگىن تيگىزدى»، - دەدى ق ر ەنەرگەتيكا ءمينيسترى.

ونىڭ دەرەگىنشە، وسى جىلدىڭ 8 ايىندا قازاقستان تاراپىنىڭ ەكسپورتى 2 ەسەگە ارتىپ، يمپورت كولەمى دە 75-76 پايىزعا ءوسىم كورسەتكەن. بۇل رەتتە ازەربايجان تاراپى قازاقستانعا مەتال قۇرىلعىلارىن، قۇبىرلار جەتكىزەدى. اتالعان جابدىقتار ەلىمىزدىڭ باتىسىندا مۇناي وپەراتسيالارىنا قولدانىلادى.

«ال ءبىز ءوز تاراپىمىزدان اۋىل شارۋاشىلىعى ونىمدەرىن، ماشينا جاساۋ، مۇناي ونىمدەرىن جەتكىزەمىز. قازىرگى ۋاقىتتا تاراپتار ۆاگوندار مەن لوكوموتيۆتەر جەتكىزۋ ماسەلەسىن تالقىلاپ جاتىر. «بايتەرەك» بۇگىندە بۇل ماسەلەنى قاراستىرۋدا»، - دەدى قانات بوزىمبايەۆ.

ازەربايجان ەنەرگەتيكا ءمينيسترى پيارۆيز شاحبازوۆ تا ەكى ەلدىڭ اراسىنداعى تاۋار اينالىمى اعىمداعى جىلى ايتارلىقتاي وسكەنىن اتاپ ءوتتى.

«بۇگىن ۇكىمەتارالىق كوميسسيامىزدىڭ 15-وتىرىسى ءوتىپ جاتىر. ونىڭ اياسىندا وتكەن جىلدىڭ ناتيجەلەرىن قورىتىندىلايتىن بولامىز. قول قويۋعا نيەتتەنىپ وتىرعان كولەمى ءارى تولىققاندى قۇجاتتارىمىزدىڭ جوباسى بار»، - دەدى ول.