الەمدەگى ەڭ سەنىمدى كولىكتەر رەيتينگى شىقتى
Consumer Reports جۋرنالىنىڭ نۇسقاسى بويىنشا ەڭ سەنىمدى اۆتوكولىكتەر رەيتينگىندە ءبىرىنشى ورىندى جاپوندىق Lexus ساۋدا ماركاسى ەنشىلەدى. بىلتىرعى جىلدىڭ كوشباسشىسى Toyota ەكىنشى ورىنعا ىعىستى. Lexus GS اۆتوكولىگى ەڭ سەنىمدى بولىپ تانىلدى.
سەنىمدىلىك جاعىنان ءۇشىنشى ورىنعا Mazda كولىك ماركاسى ورنالاستى. ونىڭ CX-9 كروسسوۆەرى مەن MX-5 رودستەر مودەلدەرى قولدانۋشىلاردىڭ وڭ پىكىرلەرىن الىپ، Mazda توعىز ساتى جوعارى كوتەرىلدى. ءتورتىنشى ورىنعا جاپوندىق Subaru ماركاسى ورنالاستى.
ال ۇزدىك بەستىكتى Kia ماركاسى اياقتاعان. ول سوڭعى ءبىر جىلدا ەكى ساتى تومەندەگەن.
التىنشى ورىنعا Infiniti ورنىقسا، ەۋروپانىڭ ەڭ ۇزدىك برەندى بولىپ Audi ماركاسى تانىلدى. ول ۇزدىكتەر ءتىزىمىنىڭ جەتىنشى ساتىسىنا ورنالاستى.
رەيتينگ 500 مىڭ اۆتوقولدانۋشىلاردىڭ 2017-جىلعى پىكىرلەرىنىڭ نەگىزىندە جاسالعان. زەرتتەۋ اياسىندا وقىرماندار سوڭعى 12 ايدا كولىكتەرىنە قاتىستى تۋىنداعان قيىندىقتارىن حابارلاپ وتىرعان.