قىرعىزدار اق قالپاقتى قورلاعاندارعا ايىپپۇل سالۋدى قاراستىرۋدا

بىشكەك. قازاقپارات - قىرعىزستاندا قىرعىز ۇلتىنىڭ اق قالپاعىنا نۇقسان كەلتىرگەندەرگە ايىپپۇل سالۋ قاراستىرىلۋدا. جوگوركۋ كەنەش دەپۋتاتتارى قازىر وسىنداي تالاپتاردى قاراستىراتىن زاڭ جوباسىن حالىق تالقىسىنا ۇسىنىپ وتىر، دەپ حابارلايدى قىرعىزستاننىڭ «كابار» اگەنتتىگى.

اگەنتتىك مالىمەتتەرىنە قاراعاندا، 2018 -جىلدىڭ 30 - قازانىندا قوعامدىق تالقىلاۋعا ق ر «زاڭ بۇزۋشىلىقتار تۋرالى» كودەكسىنە ەنگىزىلەتىن وزگەرىستەر ۇسىنىلماق.

بۇعان قىرعىزستاننىڭ جوگوركۋ كەنەشىنىڭ دەپۋتاتى ەكمات بايپاكپايەۆ باستاماشى بولعان.

زاڭدى ءتۇسىندىرۋ انىقتاماسىندا قۇجاتتىڭ «ۇلتتىق باس كيىم اق قالپاققا مادەنيەت سيمۆولى مارتەبەسىن بەرۋ تۋرالى» زاڭ جوباسىن دايىنداۋ بارىسىندا قولعا الىنعانى ايتىلادى. اتالمىش قۇجات تالاپتارىنا سايكەس، ەندىگارى قىرعىزداردىڭ اق قالپاعىن قورلاعاندارعا ارنايى زاڭ نورماسىنا سايكەس ايىپپۇل سالىنادى.

«ۇلتتىق باس كيىم اق قالپاققا مادەنيەت سيمۆولى مارتەبەسىن بەرۋ تۋرالى» زاڭ جوباسى قىرعىز حالقىنىڭ ۇلتتىق مۇراسىنىڭ ماڭىزدى ەلەمەنتتەرىنىڭ ءبىرى - اق قالپاقتىڭ يميدجىن وڭالتۋعا، ونى قورعاۋدىڭ قۇقىقتىق بازاسىن بەكىتۋگە، دامىتۋ مەن قولداۋعا، ناسيحاتتاۋعا باعىتتالعان.

زاڭ جوباسى سونىمەن قاتار قىرعىز رەسپۋبليكاسى مەن قىرعىزستان حالقىن ولاردىڭ تاريحي مۇراسى مەن اق قالپاقتى كيىپ ءجۇرۋ مادەنيەتى ارقىلى بارىنشا تانىتۋعا باعىتتالعان.

زاڭ جوباسىنا قىرعىزستاننىڭ زاڭبۇزۋشىلىقتار تۋرالى كودەكسىنە 65,2 بابى ەنگىزىلەدى. وعان سايكەس، اق قالپاقتى قورلاعاندارعا 1 دارەجەدە (جەكە تۇلعالار ءۇشىن 10 ەسەپتىك كورسەتكىش، زاڭدى تۇلعالارعا 50 ەسەپتىك كورسەتكىش) ايىپپۇل سالىنادى.

اتالمىش زاڭ تالاپتارىنىڭ بۇزىلۋىن انىقتاۋ جەرگىلىكتى ءوزىن- ءوزى اتقارۋشى ورگانداردىڭ قۇزىرىنا بەرىلەدى. زاڭ جوباسى قىرعىزستان كونستيتۋتسياسىنىڭ نورمالارىنا سايكەس كەلەدى جانە ونىڭ قۇقىقتىق، گەندەرلىك، ەكولوگيالىق، ەكونوميكالىق، سىبايلاس جەمقورلىق باعىتتارى بويىنشا ەشقانداي سالدارى بولمايدى.

اۋدارما: ايدار وسپاناليەۆ