قۇبىردا قالعان مۇنايدى قازاقستان مەن رەسەي قالاي ءبولدى

استانا. قازاقپارات - پارلامەنت سەناتىنىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا قازاقستان مەن رەسەي اراسىندا مۇنايدى بولەتىن زاڭ جوباسى تالقىلاندى، دەپ حابارلايدى قازاقپارات.

اتاپ ايتقاندا، ك س ر و كەزىندە ەلىمىزدىڭ ماگيسترالدىق مۇناي قۇبىرلار جەلىسى ءبىرىڭعاي جۇيەدە بولاتىن. ءبىراق كەڭەس ۇكىمەتى تاراعاننان كەيىن قۇبىرلار ءار مەملەكەتتىڭ اۋماقتىق قاعيداتى بويىنشا بولىنگەن بولاتىن.

 «وسى ورايدا، «تۋيمازى- ومبى- نوۆوءسىبىر-2» (تون-2) مۇناي قۇبىرىنىڭ قازاقستان بولىگىندەگى  62048 توننا تەحنولوگيالىق مۇنايدىڭ مەنشىك قۇقىعى ايقىندالماي قالعان. سونىمەن قاتار، «ومبى- پاۆلودار» قۇبىرىنىڭ رەسەيلىك ۋچاسكەسىندە  141728 توننا تەحنولوگيالىق مۇنايدىڭ مەنشىگى دە شەشىلمەگەن ەدى. ءبىراق اتالعان مۇناي اۋماقتىق قاعيداتقا ناقتى تاپسىرىلماسا دا، رەسەيدىڭ «ترانس نەفت» جاريا اكسيونەرلىك قوعامى مەن قازاقستاندىق «قازترانسويل» كومپانياسىنىڭ بالانسىنا بەرىلگەن بولاتىن. ياعني، «ومبى- پاۆلودار» قۇبىرىنىڭ رەسەيلىك ۋچاسكەسىندەگى  141728 توننا مۇناي شىن مانىندە «قازترانسويل» ا ق بالانسىندا، ال تون-2 قۇبىرىنىڭ قازاقستان اۋماعىنداعى 62 مىڭ تونناسى «ترانسنەفت» قاراماعىندا قالدى»، - دەدى ەنەرگەتيكا ۆيسە- ءمينيسترى ماعزۇم مىرزاعاليەۆ.

ونىڭ سوزىنە قاراعاندا، 2017 -جىلدىڭ 9 - قاراشاسىندا جاسالعان قازاقستان مەن رەسەي ۇكىمەتتەرىنىڭ اراسىنداعى تون-2 جانە «ومبى- پاۆلودار» ماگيسترالدىق مۇناي قۇبىرىنداعى تەحنولوگيالىق مۇنايدىڭ مارتەبەسىن ايقىنداۋ تۋرالى كەلىسىم ەكى ەل اراسىنداعى كوپ جىلدىق جۇمىستىڭ ناتيجەسى.

تەحنولوگيالىق مۇنايدى قايتارۋدا راسىمدەردى جەڭىلدەتۋ ماقساتىندا اتالعان كەلىسىممەن: بىرىنشىدەن، قازاقستان اۋماعىندا ورنالاسقان تون-2 ماگيسترالدىق مۇناي قۇبىرىنداعى  62048 توننا «قازترانسويل» ا ق- عا تيەسىلى؛ ەكىنشىدەن، رەسەي ۋچاسكەسىندە جاتقان «ومبى- پاۆلودار» قۇبىرىنداعى مۇنايدىڭ ءدال سول كولەمى (62048 توننا) «ترانسنەفت- ۋرالعا» تيەسىلى بولادى؛ ۇشىنشىدەن، رەسەيلىك ۋچاسكەدەگى «ومبى- پاۆلودار» قۇبىرىنداعى مۇنايدىڭ  79680 تونناسى «قازترانسويل» كومپانياسىنا تيەسىلى بولىپ بەكىتىلگەن.

سونىمەن قاتار، كەلىسىم كۇشىنە ەنگەن كۇننەن باستاپ، قوس تاراپ 10 اي ىشىندە «قازترانسويل» ا ق- عا تيەسىلى  79670 توننا مۇنايدى قۇبىر ارقىلى رەسەي اۋماعىنان قازاقستانعا بىرنەشە پارتيامەن جونەلتۋى قاجەت. وسىلايشا، بۇل كەلىسىم قۇبىرلارداعى مۇنايدىڭ اتالعان ۇيىمدارعا تيەسىلى ەكەندىگىن زاڭدى تۇردە ايقىندايدى.

تالقىلاۋدان كەيىن كوميتەت مۇشەلەرى «ق ر ۇكىمەتى مەن ر ف ۇكىمەتى اراسىنداعى «تۋيمازى- ومبى- نوۆوءسىبىر-2» جانە «ومبى- پاۆلودار» قۇبىرلارىنداعى تەحنولوگيالىق مۇنايدىڭ مارتەبەسىن ايقىنداۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن سەناتتىڭ جالپى وتىرىسىنا شىعارۋ شەشىمىن قابىلدادى.

اۆتور: رۋسلان عابباسوۆ