كولىكتىڭ مەملەكەتتىك تىركەۋ ءنومىرى جوعالعاندا نە ىستەۋ كەرەك؟

استانا. قازاقپارات - مەملەكەتتىك تىركەۋ ءنومىرى - جۇرگىزۋشىنىڭ كىم ەكەنىن انىقتاۋعا جانە اۆتوكولىك تۋرالى بارلىق قاجەتتى اقپاراتتى تابۋعا مۇمكىندىك بەرەتىن كەز كەلگەن كولىك قۇرالىنىڭ بەلگىسى.

وسى سەبەپتى Tengrinews.kz ءتىلشىسى تىركەۋ ءنومىرى جوعالعان جاعدايدا نە ىستەۋ كەرەكتىگىن جانە ايىپپۇلدىڭ بار-جوعىن انىقتاپ كوردى. الماتى قالاسى پوليتسيا دەپارتامەنتىنىڭ اكىمشىلىك پوليتسيا باسقارماسىنىڭ باسشىسى پولكوۆنيك جاندوس مۇراتاليەۆ ءنومىردى جوعالتقان جاعدايدا ايىپپۇل قاراستىرىلماعانىن ايتتى.

«ەڭ الدىمەن تۇراتىن مەكەن-جايىڭىز بويىنشا نەمەسە جوعالتقان جەردەگى اۋداندىق ىشكى ىستەر بولىمىنە ءوتىنىش جازۋ كەرەك. ءوتىنىش نەگىزىندە سىزگە مەملەكەتتىك ءنومىر جوعالدى نەمەسە ۇرلاندى دەگەن انىقتاما بەرىلەدى. كەيىن بۇل انىقتامامەن ارنايى حالىققا قىزمەت كورسەتۋ ورتالىعىنا بارىپ، ەسكى ءنومىرىڭىزدى قالپىنا كەلتىرىپ نەمەسە جاڭاسىن الا الاسىز. جاڭا ءنومىردى جاساۋ ءۇشىن 5 مىڭ تەڭگە كولەمىندە مەملەكەتتىك باج سالىعىن تولەۋگە تۋرا كەلەدى. ال ءبىر ءنومىر عانا بولسا، شامامەن 2500 تەڭگە شىعادى. كەيىن ءوتىنىشتى ءنومىر دايىنداۋعا جىبەرەمىز. ادەتتە بۇل 3 تەن 7 كۇنگە دەيىن سوزىلادى»، - دەيدى جاندوس مۇراتاليەۆ.

جۇرگىزۋشى جاڭا ءنومىر العىسى كەلسە، ونىڭ ەسكى ءنومىرى ەسەپتەن شىعارىلادى جانە تەحنيكالىق ءتولقۇجات پەن مەملەكەتتىك ءنومىرى اۋىسادى. وندايدا جاڭا تەحنيكالىق ءتولقۇجات ءۇشىن قوسىمشا 1 ا ە ك (2405 تەڭگە) تولەۋ قاجەت. مۇراتاليەۆتىڭ ايتۋىنشا، مەملەكەتتىك ءنومىر ارنايى حالىققا قىزمەت كورسەتۋ ورتالىعىنان الىنعان ەمەس قولدان جاسالعان بولسا، ول جالعان بولىپ سانالادى.

«مۇنداي جاعدايعا اكىمشىلىك جاۋاپكەرشىلىك قاراستىرىلعان. مەملەكەتتىك نومىرلەردە ارنايى بەلگى، گولوگرامما بار. كامەرا جالعان ءنومىردى بايقاماۋى مۇمكىن، ءبىراق پوليتسيا قىزمەتكەرلەرى ونى بايقاي الادى. ول ءۇشىن 10 نان 15 ا ە ك- كە دەيىن ايىپپۇل سالىنادى»، - دەپ ءتۇسىندىردى باسقارما باسشىسى.

سونداي-اق پوليتسەيلەر ءنومىر اۆتوموبيلدەن ءتۇسىپ قالماۋى ءۇشىن، ونى قاتتىراق بەكىتۋگە بولادى دەيدى.
«مەملەكەتتىك ءنومىردى قوسىمشا بۇراندالارمەن نەمەسە پلاستيكالىق بۇراۋمەن ورناتۋعا بولادى. ەڭ باستىسى، بۇراندالار ءنومىردىڭ سىرتقى بەينەسىن وزگەرتپەۋى كەرەك. ولاردى ساندار نەمەسە ارىپتەردىڭ ۇسىنە ورنالاستىرۋعا بولمايدى. ول جالعان مەملەكەتتىك ءنومىر بولىپ ەسەپتەلەدى. جالعان مەملەكەتتىك ءنومىردى ورناتقانى ءۇشىن 15 ا ە ك (36075 تەڭگە)، ال ونىمەن اۆتوكولىك جۇرگىزگەنى ءۇشىن ءبىر جىلعا جۇرگىزۋ كۋالىگىنەن ايىرىلادى نەمەسە 20 ا ە ك (48100 تەڭگە) مولشەرىندە ايىپپۇل سالىنادى»، - دەپ اتاپ ءوتتى جاندوس مۇراتاليەۆ.