ەلباسى تاپسىرماسى: بالاباقشا تاربيەشىسىنە قوسىمشا اقى تولەنەدى

استانا. قازاقپارات - بالاباقشادا جاڭارتىلعان مازمۇنمەن جۇمىس ىستەيتىن تاربيەشىگە قوسىمشا اقى تولەنەدى.

بۇل تۋرالى بۇگىن ق ر پارلامەنتى سەناتىنىڭ دەپۋتاتتارىمەن كەزدەسكەن ءبىلىم جانە عىلىم ءمينيسترى ەرلان ساعاديەۆ ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، مينيسترلىك مەكتەپكە دەيىنگى ءبىلىمنىڭ ساپاسىن كوتەرۋ بويىنشا جول كارتاسىن دايىنداعان. وندا بىرنەشە ۇسىنىس بار جانە قازىرگى ۋاقىتتا ولار تالقىلانۋ ۇستىندە.

«بىرىنشىدەن - ءبىرىڭعاي بىلىكتىلىك، مۇعالىمدەرگە سياقتى ۇلتتىق تەستىلەۋدى ەنگىزۋ. بيىل 60 مىڭ مۇعالىم بىزگە كەلىپ، ۇلتتىق تەستىلەۋدەن ءوتتى. 36 مىڭ مۇعالىم جوعارى باعا الىپ، جاڭا بىلىكتىلىككە يە بولدى. سونىمەن ايلىقتارى 30-50 پايىزعا دەيىن كوتەرىلىپ وتىر. ەندى سونىڭ ءبارىن تاربيەشىلەرگە ۇسىنىپ وتىرمىز»، - دەدى ول.

ناتيجەسىندە ءمينيستردىڭ سوزىنە قاراعاندا، ءبىرىڭعاي بىلىكتىلىگىن ارتتىرىپ، ۇلتتىق تەستىلەۋدەن وتكەن تاربيەشىلەردىڭ ايلىقتارى 30-50 پايىزعا ارتاتىن بولادى.

«ەكىنشىدەن، مينيسترلىك بارلىق تاربيەشىلەردى ۆ3 بلوكتان ۆ2 بلوكقا كوتەرۋ ۇسىنىستارىن جانە ەسەبىن دايىنداپ وتىر. كەلەسى جىلى ونى مەملەكەتتىك بيۋدجەتتىك كوميسسياعا شىعاراتىن بولامىز. ۇشىنشىدەن، مەكتەپتەردەگى سياقتى جاڭارتىلعان مازمۇنمەن جۇمىس ىستەيتىن پەداگوگتارعا قوسىمشا اقى تولەۋ قاراستىرىلادى»، - دەدى ەرلان ساعاديەۆ.

ەسكە سالساق، مەملەكەت باسشىسىنىڭ بيىلعى جولداۋى مەكتەپكە دەيىنگى ءبىلىم بەرۋ جۇيەسى الدىنا ەلەۋلى مىندەتتەر قويدى.