قوستاناي بالاباقشالارىنا ەلەكتروندى كەزەك ەنگىزىلدى

قوستاناي. قازاقپارات - قوستاناي قالاسىندا بالاباقشاعا كەزەككە تۇرۋدىڭ ەلەكتروندى جۇيەسى ىسكە قوسىلدى.

بۇل تۋرالى بۇگىن وڭىرلىك كوممۋنيكاتسيالار قىزمەتىندە وتكەن بريفينگتە قالالىق ءبىلىم ءبولىمىنىڭ باسشىسى ۆاسيلي سىمباليۋك ءمالىم ەتتى، دەپ حابارلايدى قازاقپارات.

بۇگىنگى تاڭدا ەلىمىزدىڭ بىرنەشە قالاسىندا بالاباقشالارعا كەزەككە تۇرۋدىڭ ەلەكتروندى جۇيەسى ەنگىزىلگەن.

ەندى بۇل قاتارعا قوستاناي قوسىلدى. ق ر ءبىلىم جانە عىلىم مينيسترلىگىنىڭ ەلەكتروندى كەزەككە قويۋدىڭ ءبىرىڭعاي تالاپتارى تۋرالى 2017 -جىلعى بۇيرىعىنا سايكەس، بالالاردى بالاباقشا كەزەگىنە قويۋدىڭ جۇيەسى جاڭارعانى ءمالىم.

«7 جاسقا دەيىنگى بالالاردى بالاباقشا كەزەگىنە ەلەكتروندى تىركەۋ جۇمىستارى پيلوتتىق رەجيمدە ءساتتى اياقتالدى. قازىرگى كۇنى جاڭا جۇيەگە 24 مەملەكەتتىك جانە 43 جەكەمەنشىك بالاباقشا قوسىلدى. بالاباقشاعا قۇجاتتاردى تاپسىرۋ، بالالاردى قابىلداۋ پروتسەستەرى اۆتوماتتاندىرىلعان. بۇل ءوز كەزەگىندە سىبايلاس جەمقورلىقتىڭ الدىن الۋعا ءتيىمدى ءادىس. ءبىر جاعىنان اتا-انا مەن ءبىلىم بولىمدەرى اراسىندا تىكەلەي بايلانىستى ازايتىپ، اتا-انالارعا ۇيىندە وتىرىپ ەلەكتروندى تۇردە ءوتىنىش جاساۋعا مۇمكىندىكتەر تۋعىزدى. نەگىزى، كەز كەلگەن اتا-انا garden.kst-goo.kz ۆەب- پورتالىنا ءوزىنىڭ جسن ەنگىزىپ، بالاعا قاتىستى مالىمەتتەردى ورنالاستىرادى. بۇدان كەيىن، بوس ورىندار تۋرالى مالىمەتتەردى باقىلاپ وتىرۋ قاجەت. ەگەر ۇيالى تەلەفونىڭىزعا بوس ورىن تۋرالى اقپارات كەلسە، 3 كۇننىڭ ىشىندە بالاباقشانى تاڭداپ، جولدامانى راسىمدەيسىز. ءۇش كۇننىڭ ىشىندە جولدامانى الماساڭىز ءسىزدىڭ كەزەگىڭىزگە باسقا ازاماتتار ۇمىتكەر بولادى. ءوتىنىش تولتىرۋعا، جولداما بەرۋگە ءبىلىم ءبولىمىنىڭ ماماندارى ارالاسا المايدى. بۇگىندە قوستانايدا 8900 بالا ەلەكتروندى كەزەكتە تۇر»، - دەدى ۆاسيلي سىمباليۋك.

ءبولىم باسشىسىنىڭ ايتۋىنشا، جالپى «سيفرلىق قازاقستان» باعدارلاماسى اياسىنداعى ءىس-شارالارعا قالالىق ءبىلىم بولىمىنەن 17 ميلليون تەڭگەدەن استام قارجى ءبولىندى.