الماتىدا ۇلتتىق قاۋىپسىزدىك كوميتەتىنىڭ «قىزمەتكەرى» ۇستالدى
قالالىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، ارنايى باتالون ەكيپاجى سەيفۋللين مەن قابانباي كوشەلەرىنىڭ قيىلىسىندا «مەرسەدەس» كولىگىنە نازار اۋدارعان. كولىكتىڭ الدىڭعى جانە ەكى جاق بۇيىرىندەگى بارلىق تەرەزەلەر كولەگەيلەنگەنى كۇدىك تۋعىزعان.
كولىكتى تىزگىندەگەن تاراز قالاسىنىڭ تۋماسى ستانيسلاۆ زرەينوۆ بۇعان دەيىن قر قك 202-بابىنىڭ 1-بولىگىمەن جانە 293-بابىنىڭ 2-بولىگىمەن ءىستى بولعانى انىقتالدى.
«كولىگىنە ر ف مەملەكەتتىك تىركەۋ ءنومىرى ورناتىلعانى انىقتالدى. كولىكتى تەكسەرۋ كەزىندە جۇرگىزۋشى كورسەتكەن تەحنيكالىق پاسپورت تا مەملەكەتتىك ءنومىر سياقتى جالعان بولىپ شىقتى. ودان بولەك، كولىك باگاجىنان 4 كومپلەكت مەملەكەتتىك ءنومىر، كىسەن، بيتا تابىلدى. جۇرگىزۋشىنىڭ ءوزىن تەكسەرۋ كەزىندە ۇ ق ك دەپارتامەنتى قىزمەتكەرىنىڭ جالعان كۋالىگى تابىلدى. بۇل زاتتاردىڭ بارلىعى ق ر ق ك-نىڭ 385-بابى بويىنشا قوزعالعان قىلمىستىق ىسكە زاتتىق ايعاق رەتىندە تاركىلەنىپ الىندى»، - دەدى قالالىق پوليتسيا دەپارتامەنتىنىڭ اكىمشىلىك پوليتسيا باسقارماسىنىڭ باسشىسى جاندوس مۇراتاليەۆ.
ونىڭ ايتۋىنشا، زرەينوۆ ق ر ءا ق ك-نىڭ ءبىرقاتار بابىن بۇزعاندىقتان كولىك ايىپ تۇراعىنا قويىلدى.
