ساياسات نۇربەك: ءبىلىم الۋ ءۇشىن شەتەلگە كەتىپ جاتقان جاستاردىڭ كوبەيگەنى قىنجىلتادى
دەپ حابارلايدى «قازاقپارات» ح ا ا ءتىلشىسى.
بۇعان دەيىن قوستاناي وبلىسىنىڭ التىنسارين اۋدانىنداعى «جايلاۋ» دەمالىس بازاسىندا ايماقارالىق اقپاراتتىق لاگەرى وتكەنىن حابارلاعان ەدىك.
اقپاراتتىق الاڭدا قوستانايلىق جاستارعا تاجىريبەلى ماماندار ءدارىس وتكىزدى. سولاردىڭ ءبىرى - ساياسات نۇربەك. بەلگىلى ساياساتتانۋشى زاماناۋي ۇردىستەردىڭ قازىرگى قازاق قوعامىندا قالاي ىسكە اسىپ جاتقانى تۋرالى ايتتى.
«قازاقستاننىڭ ءار وڭىرىندە جاس بۋىنمەن ءتۇرلى فورماتتاعى كەزدەسۋلەر ۇيىمداستىرىلىپ جاتىر. بۇگىن قوستاناي وبلىسىندا تۇڭعىش رەت جاستار لاگەرى ءوتتى. بۇل شاراعا رەسەيدەن قانداستارىمىزدىڭ كەلگەنى قۋانتتى. باسقوسۋدا اقپارات جەدەل الماسىپ جاتقان قازىرگى ۋاقىتتا جاستارعا دۇرىس باعىت بەرۋ تالقىلاندى. سونداي- اق، « Big dataجانە جاساندى ينتەللەكت» تاقىرىبىندا ءدارىس ءوتتى. جاساندى ينتەللەكت باعدارلامالىق جۇيەلەرى بارلىق سالاعا كىرىكتىرىلىپ جاتىر. ەرتەرەكتە ادامدار عانا ويلاي الادى دەگەن تۇسىنىك قالىپتاستى. ءبىراق، بۇل مونوپوليا وزگەردى. روبوتتار ادامداردان دا ساپالى، جەدەل جۇمىس ىستەيتىن بولدى. الدا تالاي تەحنولوگيالىق ريەۆوليۋتسيالار كۇتىپ تۇرعانىن ەسكەرۋ قاجەت. نەگىزى وسى جاساندى ينتەللەكت ءۇردىسى قايدان پايدا بولدى؟ سىرتقى ميگراتسيانى قالاي توقتاتامىز؟ مىنە، قوستانايلىق جاستارمەن وسى ىسپەتتەس سۇراقتاردى قاراستىردىق»، - دەيدى ساياسات نۇربەك.
ساياسات تانۋشىنىڭ سوزىنە سۇيەنسەك، تۇيتكىلدەردىڭ دەنى ءبىلىم سالاسى ارقىلى شەشىلەدى. قازاقستاندا زامان تالابىنا ساي جاڭا ماماندىقتار اشىلدى. روبوتتاندىرۋ جاقسى ءۇردىس، ءبىراق، بيوتەحنولوگيانى دا نازاردان تىس قالدىرماعان ءجون دەپ ەسەپتەيدى سپيكەر.
«ءبىلىم سالاسىنا الاڭداۋشىلىق بىلدىرمەيمىز دەسەك تە، شەشىمىن تاپپاعان سۇراقتار بار. ءبىر عانا قوستاناي وبلىسىن مىسالعا الايىق. قازىرگى كەزدە كورشىلەس رەسەيگە ءبىلىم الۋ ءۇشىن قونىس اۋدارىپ جاتقان جاستارىمىز كوبەيدى. ولارعا كىنا ارتا المايمىز. ويتكەنى، وزدەرىنىڭ الەۋەتتەرىن اشاتىن تەتىكتەردى كورشى ەلدەن ىزدەيدى. وسى سۇراق ءبىزدى كوبىرەك قىنجىلتادى ءارى تولعاندىرادى. مىنا، ءبىز ەلىمىزدە دە ساپالى ءبىلىم بەرەتىن وقۋ ورىندارى بار ەكەنىن تۇسىندىرسەك، ەشكىم سىرت جاققا كەتپەيدى. ءتىپتى، «سيفرلى قازاقستان» باعدارلاماسى ارقىلى قولعا الىنعان جوبالاردى كوبى بىلمەيدى. استانا حاب پەن ءتۇرلى ستارتاپتار بار، نازاربايەۆ ۋنيۆەرسيتەتىندە جاڭا ماماندىقتار اشىلىپ جاتىر. قىسقاسى، جاستار ءوز جەرىمىزدە ءتيىمدى جوبالاردىڭ بارىن بىلسە ەكەن دەيمىز. وسىنداي جاڭالىقتاردى ءوز جاستارىمىزعا ءتۇسىندىرۋ ءۇشىن ەلدىڭ وڭىرلەرىن ارالاپ ءجۇرمىز»، - دەپ ءبولىستى ساياساتتانۋشى.
اۆتور: قاسقىرباي قويشىمانوۆ
