ەۋروپالىق ساراپشى: قازىر قازاقستان سياقتى وزگەلەرمەن جاقسى قارىم- قاتىناستاعى ەلدەر از

استانا. قازاقپارات - قازىر بارلىق نەگىزگى ويىنشىلار سەنەتىن ءارى جۇرتتىڭ بارىمەن جاقسى قارىم- قاتىناس ورناتقان ەلدەر از. قازاقستان - سولاردىڭ ءبىرى. بۇل تۋرالى «قازاقپارات» ح ا ا تىلشىسىنە قاۋىپسىزدىك جانە دامۋ ساياساتى ينستيتۋتىنىڭ ديرەكتورى سۆانتە كورنەلل (شۆەتسيا) ايتىپ بەردى.

«پرەزيدەنت نازاربايەۆتىڭ اسەم (بريۋسسەلدەگى «ازيا - ەۋروپا» فورۋمىنىڭ 12- ءسامميتى) وتىرىسىندا وقىعان بايانداماسى كەيبىرەۋلەرگە مازا بەرمەۋى مۇمكىن، ويتكەنى ول گەوساياسي باسەكە جانە باقىلاۋدان شىعىپ بارا جاتقان شەشىلمەگەن قاقتىعىستار ماسەلەسىن كوتەردى. الايدا پرەزيدەنت نازاربايەۆ كوپتەگەن ەۋروپالىقتار مەن ازياتتاردى الاڭداتاپ جۇرگەن ماسەلەلەردى ايقىن كورسەتىپ بەردى. ياعني بۇگىنگى الەم كەشەگىگە قاراعاندا قاۋىپسىز، الايدا بۇگىن تاۋەكەلدەر وتە كوپ»، - دەدى سۆانتە كورنەلل.

«قازاقستان پرەزيدەنتى ۇلى دەرجاۆالاردىڭ باسەكەلەسۋ ارقىلى ايماقتىق قاقتىعىستاردى شيەلەنىستىرىپ جاتقانىنا، بۇل جاعداي تۇيىتكىلدەردى شەشۋدى قيىنداتىپ وتىرعانىنا سامميت قاتىسۋشىلارىنىڭ نازارىن اۋداردى»، - دەدى ول.

وسىعان وراي، ساراپشىنىڭ پىكىرىنشە، نۇرسۇلتان نازاربايەۆتىڭ ۇلى دەرجاۆالاردىڭ اراسىندا ديالوگ ورناتۋ باستاماسى قاجەت ءارى ۇنامدى باستاما.

«مۇنى ىسكە اسىرۋعا بولا ما، جوق پا - ازىرگە بەلگىسىز. ءبىراق ماسەلە مىنادا، قازىر بارلىق نەگىزگى ويىنشىلار سەنەتىن ءارى جۇرتتىڭ بارىمەن جاقسى قارىم- قاتىناس ورناتقان ەلدەر از. قازاقستان - حالىقارالىق ساياساتتاعى پوزيتيۆتى ءرولى مەملەكەت اياسىنان شىعاتىن ەلدەردىڭ ءبىرى. ەگەر پرەزيدەنت نازاربايەۆ ۇسىنعان ديالوگ ىسكە اساتىن بولسا، ونى استانادا وتكىزۋ قيسىندى بولار ەدى»، - دەپ ءتۇيدى سۆانتە كورنەلل.

فوتو: news.day.az